Ish-ministri i Tregtisë dhe Industrisë, Ismet Mulaj ia ka parashtruar disa pyetje të vështira ministrit në detyrë të Bujqësisë, Armend Mujës, të premten.
Mulaj e ka kritikuar ministrin aktual të Bujqësisë për standarde të dyfishta dhe mungesën e nxjerrjes së një rregulloreje për standardizimin e produkteve me origjinë shtazore e bimore.
Në një shkrim në Facebook të premten, ish-ministri nga AKR-ja në Qeverinë Thaçi II, e pyeti Mujën edhe për pamundësinë e eksportimit të produkteve me origjinë shtazore nga Kosova në vendet e BE-së dhe tregjet e tjera.
Ai përmendi edhe çështjen e importit të zallit nga Serbia e Shqipëria, ndërsa gurthyesit vendorë ballafaqohet me probleme brenda vendit.
Të gjitha pyetjet e ish-ministrit Mulaj për ministrin në detyrë Armend Muja:
Ministër, pse që nga viti 2021 Kosova ende nuk ka rregullore për standardizimin e produkteve me origjinë shtazore dhe atyre me origjinë bimore? Kujt i ka konvenuar kjo gjendje?
Ministër, a është i akredituar laboratori i testimit në AUV? Nëse po, për cilët parametra dhe cilat metoda të analizës?
Ministër, i kujt është faji që bizneset tona që prodhojnë produkte me origjinë shtazore ende nuk e kanë të mundur eksportin në Bashkimin Evropian dhe tregje të tjera?
Ministër, pse vazhdojmë të importojmë zall nga Serbia dhe Shqipëria, ndërsa gurthyesve vendorë nuk u vazhdohen kontratat e qirasë?
Ministër, pse nuk po i nënshkruani kontratat për pronat e Agjencisë Pyjore të Kosovës për instalimin e paneleve solare, kur investitorët kanë gati pesë vjet që presin dhe sorollaten nëpër zyrat e shtetit e na importojmë rrymë?
Unë e dua prodhimin vendor para atij që vjen nga jashtë, por jam për kontroll të njëjtë, standarde të njëjta dhe zbatim të barabartë të ligjit për të gjithë.
