Kryeministri i Kosovës, Albin Kurti, ka akuzuar emisarin Miroslav Lajçak për koordinim me Vuçiqin për dialogun Kosovë-Serbi dhe anshmëri të tij duke e përkrahur shtetin serb.
Lidhur me këtë, BE ka thënë se nuk i komenton akuzat e pabaza, ndërsa DASH-i ka vlerësuar përpjekjet e palodhura të Miroslav Lajçakut, në dialogun Kosovë-Serbi.
Ndërsa, BE ka kërkuar sot që palët të nisin zbatimin e Marrëveshjes për normalizim të raporteve, të formohet Asociacioni pa parakushte dhe të mbahen zgjedhjet në veri.
Për dialogun në këtë fazë, deklaratat e Kurtit, BE-së e DASH-it, për Gazeta Blic ka folur ish ministrja e integrimeve, Mimoza Ahmetaj.
Ajo thotë se dialogu është sjell në raporte ndërpersonale dhe jo institucionale ndërshtetërore në mes të dy shteteve dhe ndërmjetësuesit, që thotë se kjo flet për gjendjen psikologjike të Kurtit i gjendur nën sanksione nga Evropa, SHBA dhe bota demokratike.
“Dialogu Kosovë – Serbi në vend se të zhvillohet në raporte institucionale ndërshtetërore në mes të dy shteteve dhe të facilituar/ndihmuar nga BE, është sjell në raporte ndërpersonale, pra, Kurti negocion me Lajçakun dhe jo Kosova me Serbinë. Rrjedhimisht me logjikën e Kurtit, BE nga një ndërmjetësues/lehtësues është shndërruar në individ (Lajçaku) që e “bllokon”, “saboton” Kosovën dhe “bashkëpunon” me Serbinë. Kjo më tepër sesa për Lajçakun dhe këdo tjetër, flet për gjendjen psikologjike të Kurtit i gjendur nën sanksione nga Evropa, SHBA dhe bota demokratike, dhe në pamundësi të manovrimit, kapjes së institucioneve dhe manipulimit brenda në vend”, thotë ajo për Gazeta Blic.
Sipas ish ministres, qëndrimi i BE-së për zgjedhje në veri është në harmoni me qëndrimin e ekspertëve ligjorë në Kosovë.
“Qëndrimi i BE-së që komunat duhet të shkojnë në zgjedhje dhe jo që kryetarët të ndërrohen me nënshkrimet e mbledhura nga qytetarët është në harmoni me qëndrimin e ekspertëve ligjorë në Kosovë dhe interpretuesve të Kushtetutës së Kosovës, që në vazhdimësi e kemi dëgjuar. Insistimi i Kurtit që kryetarët të ndryshohen përmes nënshkrimeve të mbledhura më tepër sesa për katër komunat në veri ka të bëjë me mundësinë që ky vendim në të ardhmen do t’ia jepte Kurtit mundësinë që me nënshkrime të manipuluara të qytetarëve të ndërhynin në votën e drejtë të qytetarëve. Pra, rasti i humbjeve të zgjedhjeve lokale në të gjitha komunat në Kosovë (përveç tri komunave), një vit pas zgjedhjeve nacionale e konfirmon këtë tezë”, vlerëson Ahmetaj.
Sa i përket sanksioneve, ajo potencon se ato duket se do të vazhdojnë dhe këtë po e vuajnë qytetarët, e këtë e konfirmon edhe fakti që presidenti Osmani u ftua nga SP i NATO në takim në vend të kryeministrit.
“Sanksionet ndaj Kurtit po duket që do të vazhdojnë, ndërkohë që fatkeqësisht qytetarët e Kosovës janë duke i vuajtur këto masa. Fakti që SP i NATO-s e ftoi znj.Osmani në takim në Bruksel në vend të shefit të ekzekutivit, si dhe që marrëveshja e ndihmave nga SHBA u nënshkrua nga ajo dhe jo nga Kurti (ekzekutivi) e konfirmon gjendjen e tillë”, deklaron ish ministrja e integrimeve, Mimoza Ahmetaj.
