Policia sot në Mitrovicën e jugut ka arrestuar një person të kërkuar me urdhëresë aktive të Gjykatës. Bëhet e ditur se arrestimi i të dyshuarit është realizuar pasi ndaj tij kishte urdhëresë aktive i cili ishte i dënuar nga Gjykata me burgim në kohëzgjatje prej dymbëdhjetë (12) muajsh për veprën penale ,,Keqpërdorim i pozitës apo autoritetit zyrtar”.
Pas përfundimit të procedurave të nevojshme policore, i dyshuari është dërguar në vuajtje të dënimit.
Veriu.info mëson se i arrestuari është Hajriz Kajtazi, ish roje pylli në Sektorin e Pylltarisë në Komunën e Mitrovicës.
Ai ishte shpallur fajtor në prill të vitit të kaluar dhe ishte dënuar nga Gjykata Themelore e Mitrovicës me një (1) vit burgim.
Ndryshe, sipas aktakuzës së ngritur më 8 dhjetor 2023 nga Prokuroria Themelore në Mitrovicë, Hajriz Kajtazi akuzohej se gjatë vitit 2018 në pozitën e rojes së pyllit pranë Drejtorisë për Mbrojtjen e Mjedisit dhe Pyjeve – Sektori i Pylltarisë, Komuna e Mitrovicës, në terrenin “Javor – Lisaç” ka keqpërdorur detyrën zyrtare me qëllim që të përfitojë çfarëdo dobie pasurore për vete apo personin tjetër, ashtu që në bazë të raportit mbi regjistirmin e dëmeve pyjore për vitin 2018 përpiluar nga komisioni i sektorit të pylltarisë, i ka shkakruar dëm Agjencisë së Pyjeve të Kosovës nga prerjet ilegale në vëllim prej 329.64 m3, në vlerë prej 44 mijë e 415 euro.
