Në Gjykatën Themelore në Mitrovicë, të premten është dhënë fjala përfundimtare në rastin, ku Haxhimet Ferati po ngarkohet se në cilësinë e menaxherit të Zyrës së Prokurimit në Komunën e Mitrovicës, ka kryer veprën penale “keqpërdorim i pozitës apo autoritetit zyrtar”, duke lidhur kundërligjshëm ankes-kontratë me operatorin NTP ‘Tropik’’ në vlerë prej 220 mijë euro.
Fillimisht, kryetari i trupit gjykues Rrahman Beqiri njoftoi se gjykata e ka pranuar vendimin nga Drejtoria për Shërbime Publike dhe Infrastrukturë në Komunen e Mitrovicës, ku më pas i njejti vendim u lëxua në cilësi të provës materiale, raporton Betimi per Drejtësi.
Fjalën përfundimtare, prokurori Sahit Tmava e dorëzoi me shkrim në gjykatë. Prokurori Tmava tha se kryerja e veprës penale nga i pandehuri provohet nga: marrëveshja e pasfinancimit, kontrata 034/14 e lidhur në mes të komunës së Mitrovicës dhe operatorit NTP Tropik, aneks kontrata, kontrata kornizë e lidhur duke bërë shkelje të legjislacionit në fuqi, deklarata e dëshmitarës Florije Saliu, si dhe nga deklaratat e të pandehurit që gjenden në shkresa të lëndës.
Kurse, mbrojtësi i të akuzuarit Haxhimet Ferati, avokati Armend Shkoza në fjalën përfundimtare tha se i perserisin të gjitha kundërshtimet dhe prapsimet, të cilat i kanë parashtruar gjatë zhvillimit të kësaj çështje penale. Ai tha se asnjë nga provat e administruara nuk e kanë vertetuar qëllimin që i mbrojturi i tij të përfitojë materialisht qoftë për vete apo për personin tjetër.
Tutje, Shkoza deklaroi se pretendimi i prokurorisë për pëfitimin e mbi 200 mijë euro nuk është vertetuar nga asnjë ekspertizë. Mbrojtësi i të akuzuarit Ferati, avokati Shkoza tha se prokuroria nuk e ka identifikuar palën e dëmtuar edhe pasi kemi pasur një procedurë ligjore që ka pasur të bëjë me shpenzimin e parasë publike.
Sipas mbrojtjes prokuroria nuk ka arritur të vërtetoj se lidhja e aneks kontratës eshtë bërë në mënyrë të kundërligjshme.
Ndërsa, i akuzuari Haxhimet Ferati në fjalën përfundimtare, tha se si zyrtar përgjegjës i prokurmit ka punuar me nder dhe perkushtim që paraja publike të shfrytëzohet sa më mirë dhe në vendin e duhur. Ai kërkoi nga gjykata që të lirohet nga aktakuza dhe në aktgjykim të refuzohen të gjitha pretendimet e ngritura në aktakuzë.
Ndryshe, sipas aktakuzës së ngritur më 2 tetor 2023, Haxhimet Ferati akuzohet se më 19 nëntor 2014, në pozitën e menaxherit të prokurimit publik pranë Drejtorisë së Prokurimit, në Komunën e Mitrovicës, duke shfrytëzuar pozitën e tij dhe duke tejkaluar autorizimet e tij, me qëllim të përfitimit të kundërligjshëm të një dobie pasurore për vete ose tjetrin në kundërshtim me LPP nr. 04L-042, ka lidhur aneks- kontratë me Operatorin Ekonomik NTP “Tropik” me të cilin ka pasur kontratë kornizë trivjeçare.
Po kush qendron operatori ekonomik NTP Tropik?
Veriu.info ka hulumtuar në regjistrimin e Agjencia e Regjistrimit të Bizneseve të Kosovës, ku ka gjetur se pronar i kësaj kompanie është Ismail Shabani nga Mitrovica.
Sipas pretendimeve të prokurorisë, dyshohet se komuna e Mitrovica ka lidhur kundërligjshëm aneks-kontratë me biznesin Ismail Shabani B.I. me emër tregtar N.T.P. “Tropik”, duke i dhënë kësaj kompanie punë 220 mijë në mënyrë të kundërligjshme.
Kompania N.T.P. “Tropik” nuk është e panjohur për mitrovicasit, pasi që ajo në vitin 2016 kishte nënshkruarn kontratë për marrjen e një prone të paluajtshme në mes të qytetit të Mitrovicës për parking në afat prej 15 vitesh, ku sipas projektit dhe kontratës së nënshkruar ishte paraparë të ndërtohet parking dykatësh nën tokë, por që në vitin 2018 kishte kërkuar revidimin e Lejes Ndërtimore, duke i mundësuar vetëm një kat ndërtimi nën tokë./Veriu.info
