Të premten në Klinë, në stadiumin 18 Qershori, Liria dhe Dinamo i Ferizajt, do të kenë përballjen e barazhit, se cila skuadër do të luaj ndeshjen e jetës me skuadrën e tetë të Superligës për inkuadrim në elitë, dhe të dyja skuadrat rivale, po i zhvillojnë përgatitjet e fundit në aspekt taknik dhe teknik.
Ismet Munishi, trajneri i Lirisë, deklaroi për Klan Kosova se skuadra e tij është gati, por nuk e gënjen fitorja e fundit 1-5 në Ferizaj, ngase tashmë është vetëm një ndeshje dhe kujdesi do të jetë i shtuar.
“Kam shumë besim te skuadra ime, por gjithsesi na pret një përballje e vështirë me një kundërshtar të veshtirë. Këto ndeshje e kanë peshën e vet. E kam thënë edhe pas ndeshjes së fituar 1-5 ditë më parë në Ferizaj se nuk ka qenë pasqyre reale, pasi ndeshja sipas meje ka qenë më e baraspeshuar dhe nuk na gënjen ajo ndeshje para kësaj që na pret”, deklaroi Munishi. Ai shtoi. “Do të jemi më të kujdesshëm, sepse është vetëm një ndeshje. Tash kemi edhe përparësi ngase na rikthehet në skuadër edhe Liridon Fetahaj, një lojtar fantastik që ka peshë në skuadër dhe do të jetë një forcë shtesë për neve,” përfundoi Munishi.
Ndeshja Liria-Dinamo (F), do të transmetohet direkt të premten në ArtMotion nga ora 16.00. /Klankosova.tv
