Pas deklaratave të përfaqësuesit iranian në mbledhjen urgjente të Këshillit të Sigurimit të OKB-së, reagimi nuk ka munguar nga Izraeli.
Përfaqësuesi izraelit, Danny Danon, ka dalë në mbrojtje të vendimit të presidentit amerikan, Donald Trump, për të goditur objektet bërthamore të Iranit, duke e konsideruar veprimin si të domosdoshëm dhe të vonuar.
“E gjithë bota duhet të thotë zyrtarisht faleminderit këtu sot,” deklaroi Danon. “Faleminderit Donald Trump që veproi kur kaq shumë njerëz hezituan”.
Duke iu përgjigjur kritikëve të SHBA-së dhe Izraelit brenda OKB-së, Danon u shpreh: “Disa këtu kanë denoncuar SHBA-në dhe Izraelin, por ku ishit kur Irani pasuroi uraniumin përtej pikës së përdorimit civil, kur ndërtoi një fortesë poshtë një mali për t’u përgatitur për shfarosjen tonë?”.
Sipas tij, diplomacia ishte provuar, por ishte keqpërdorur nga regjimi iranian: “Diplomacia u provua. Irani i shndërroi negociatat në teatër dhe i përdori ato si kamuflazh për të blerë kohë, për të ndërtuar raketa dhe për të pasuruar uraniumin”.
“Bota e lirë i dha çdo shans,” shtoi Danon. “Por kostoja e mosveprimit do të kishte qenë një dënim me vdekje”.
