Kallëzim penal është dorëzuar në Prokurorinë Speciale ndaj Kryeinspektorit të Punës, Hekuran Nikçi, i cili është emëruar në këtë pozitë nga qeveria e drejtuar nga Albin Kurti – kundërligjshëm – që dy vjet.
Kallëzim penal e ka dorëzuar në Prokurori udhëheqësi i Divizionit të Koordinimit në Rajonin e Mitrovicës në kuadër të Inspektoratit të Punës, Nexhat Fazliu.
Këtë kallëzim penal e ka siguruar Gazeta Online Veriu.info, e aty thuhet se se i dyshuari Nikçi ka kryer veprën penale që parashihet në nenin 386, paragrafi 1, pika 1.3, neni 394, paragrafi 1 dhe 2, neni 414, paragrafi 1 dhe 2 të Kodit Penal të Kosovës.
Nexhat Fazliu në cilësinë e personit zyrtar ka parashtruar kallëzim penal ndaj kryeinspektorit Nikçi për mozbatimin e aktgjykimeve gjyqësore të Gjykatës Supreme të datës 25 shtator 2024, Gjykatës së Apelit të datës 9 korrik 2024 dhe Gjykatës Themelore në Prishtinë – Departamenti për Çështje Administrative i datës 14 prill 2024, lidhur me vendimin e Këshillit të Pavarur Mbikëqyrës për Shërbimin Civil të Kosovës të datës 14.07.2022.
Pra Fazliu ka denoncuar se Hekuran Nikçi është i punësuar pa konkurs publik, gjë që vërtetohet edhe me vendimin e KPMSHC-së, të cilët janë të obligueshëm të zbatohen.
Në kallëzimin penal theksohet se ministria e Hekuran Muratit kishte ushtruar ankesë në Gjykatën Themelore në Prishtinë, e cila e kishte refuzuar atë, duke lënë në fuqi vendimin e KPMSHC-së. Ministria vazhdoi me ankesë në Gjykatën e Apelit e cila po ashtu e rrëzoi atë, e njëjtë veproi edhe Gjykata Supreme.
Fazliu është ankuar se me këtë punësim pa konkurs të Hekuran Nikçit, i është mohuar e drejta për të konkurruar për pozitën e Kryeinspektorit të Punës, pasi që thekson se “i plotësoj të gjitha kushtet dhe kriteret për të konkurruar në këtë pozitë…”.
Këtë e ka bazuar në dispozitën e nenit 219 të Kodit Penal: “Cenimi i të drejtave të punësimit dhe papunësisë”.
Aty thuhet se “kushdo që ia mohon apo kufizon personave të drejtën në punësim në kushte të njëjta, ashtu siç është përcaktuar me ligj, dënohet me gjobë ose me burgim deri në dy vjet”.
Hekuran Nikçi sipas këtij kallëzimi penal ka kryer veprën penale “mosekzekutim i vendimeve gjyqësore”, duke qenë se ai nuk ka respektuar vendimin e gjykatës dhe vazhdon të qëndrojë kundërligjshëm në pozitën e Kryeinspektorit.
Pos këtyre, ai është kallëzuar edhe se është duke ushtruar presion që të mos bashkëpunojë as me Policinë e Kosovës me autorizim të Prokurorisë Speciale.
