Ditët e fundit të mandatit të tij të parë si kryetar i Shtimes po e gjejnë Qemajl Aliun përballë një bilanci të rëndë me premtime të pambajtura. Me vetëm pak javë deri në zgjedhjet e 12 tetorit, kryetari i Lëvizjes Vetëvendosje rikthehet para qytetarëve për të kërkuar edhe një mandat tjetër, ndonëse shumë nga zotimet që i bëri katër vite më parë kanë mbetur vetëm në fletët e programit zgjedhor.
Nga biblioteka online dhe uebfaqja për shkolla, te funksionalizimi i çerdhes së dytë, rrjeti i ujësjellësit në fshatra, pagat jubilare për mësimdhënësit dhe shëndetësinë, e deri tek kyçja në autostradë dhe themelimi i Muzeut të Memories në Reçak, pra lista e premtimeve të parealizuara është e gjatë.
Sipas të dhënave të publikuara nga Instituti GAP, gjatë mandatit 2021–2025 Aliu ka dhënë gjithsej 107 premtime. Nga to, vetëm 46 janë përmbushur, 26 gjysmë të përmbushura, 21 të filluara, ndërsa 14 nuk kanë nisur fare. Pikërisht këto zotime të pa filluara janë më të dhimbshmet për qytetarët, sepse lidhen me fusha thelbësore të jetës publike.
Një prej tyre është krijimi i bibliotekës online dhe i një uebfaqeje që do të lidhte të gjitha shkollat e komunës. Ky projekt ishte prezantuar si hap drejt digjitalizimit të arsimit në Shtime, por katër vite më vonë ai nuk ka as gjurmë.
Në fushën sociale, Aliu premtoi marrjen përsipër të tri pagave jubilare dhe tri pagave përcjellëse për punëtorët e arsimit dhe shëndetësisë që dalin në pension. Deri më sot, ky zotim as nuk ka nisur, duke e lënë komunën në borxh moral e financiar ndaj punëtorëve të saj, shkruan Insajderi.
Në aspektin e infrastrukturës, kryetari kishte folur për kyçjen në autostradën “Ibrahim Rugova” përmes aksit rrugor Duhël-Lipjan. Ky projekt, i domosdoshëm për zhvillimin ekonomik të zonës, nuk ka pasur asnjë hap konkret deri më tash. Po ashtu, investimi në Muzeun e Shtimes dhe themelimi i Muzeut të Memories në Reçak mbetën vetëm premtime në letër.
Edhe në menaxhimin e hapësirave urbane, kryetari Aliu nuk ka bërë asnjë hap përpara. Premtimi për caktimin e një sistemi taksash për zonat e parkingjeve, sa më afër qendrës aq më shtrenjtë, nuk ka nisur fare, duke lënë qytetin pa një rregullim të nevojshëm të trafikut dhe parkimit.
Po ashtu, Aliu premtoi përfundimin e rrjetit të ujësjellësit në të gjitha fshatrat e komunës brenda dy viteve të para të mandatit, por realiteti tregon se banorët e shumë fshatrave ende përballen me mungesë të ujit të pijshëm.
