Gazetari Adriatik Kelmendi ka reaguar pas mohimit nga Zyrat e OKB-së në Kosovë për ndërprerjen e kontakteve me Qeverinë e Kosovës.
Pas një raportimi të mbrëmshëm, ku Kelmendi pretendoi se koordinatorja e OKB-së në Kosovë kishte dërguar një letër drejtuar agjencive të OKB-së, ku udhëzohej që ato të mos mbajnë kontakte zyrtare me përfaqësuesit e Qeverisë Kurti për shkak të mungesës së legjitimitetit, Kelmendi ka konfirmuar dërgimin e një emaili nga zyra e OKB-së.
Në reagimin e tij të sotëm, Kelmendi theksoi: “E konfirmoj se të hënën, pasdite, një email nga zyrja e OKB-së në Kosovë është dërguar në disa adresa të përfaqësuesve të këtyre agjencive, në të cilin jepen udhëzime se si duhet të jetë niveli i komunikimit me Qeverinë e Kosovës, derisa ajo është në detyrë.”
Ai gjithashtu sqaroi se si gazetar ruan të drejtën për të mos zbuluar burimet e informacionit, por u bëri thirrje atyre që janë të interesuar të kërkojnë dhe publikojnë përmbajtjen e këtij emaili.
Në fund, Kelmendi shfrytëzoi mundësinë për të komentuar për lajmet që shpesh quhen “fake news”, duke përmendur rritjen e çmimit të rrymës si një shembull ku ajo që ishte përfolur si dezinformatë u vërtetua si e vërtetë.
“Njëjtë edhe me shumë lajme të tjera,” përfundoi ai.
