Prindron Sadriu, bashkëshorti i presidentes Vjosa Osmani, tha sot se “rreziku është i qartë” pas kërcënimeve në adresë të presidentes.
Zyra e Presidentes publikoi të martën një kërcënim me jetë ndaj presidentes Osmani përmes një mesazhi në e-mail.
Sadriu tha se ky nuk është kërcënimi i parë dhe i vetëm ndaj bashkëshortes së tij. Ai tha se janë “dhjetëra”.
“Dhjetëra kërcënime publike me jetë ndaj Presidentes së dhe familjes së saj. Jo një. Jo dy. Dhjetëra. Të përsëritura, të drejtpërdrejta, të qarta. Specifike. Nga profile me emra e mbiemra, anonime, por edhe nga zëra të njohur, me emër e mbiemër”, tha ai në një shkrim në Facebook të martën.
Sipas Sadriut, kërcënimet ndaj presidentes nuk janë thjesht fjalë, por “janë sistem”.
“Dhe mbi të gjitha: janë pasojë direkte e mosveprimit. Sepse askush nga kërcënuesit nuk është përballur me drejtësinë. Asnjë veprim. Asnjë përgjegjësi”, tha ai.
“Sot është Presidentja. Nesër dikush tjetër? Rreziku është i qartë”.
