Një seancë gjyqësore në terren për ndarje pasurie pas divorcit është shndërruar në skenë kërcënimi serioz sot në Prishtinë. Ish-kunati i njërës prej palëve, Adem (Ahmet) Berbatovci, po akuzohet se ka kërcënuar hapur me jetë ish-kunatën e tij, me inicialet A.B., në prani të Gjykatëses Ilire Vitija.
Ngjarja ka ndodhur sot, më 11.06.2026, rreth orës 11:00, gjatë kohës kur Gjykatësja Vitija, eksperti së bashku me bashkëpunëtorin e tij, avokatja mbrojtëse Saranda Keçekolla, dhe ish-bashkëshorti i viktimës, Tahir Berbatovci (i njohur si “Tahir Fushë Kosova”), i shoqëruar nga avokati i tij Xhevdet Smakaj, po inspektonin pasurinë e përbashkët që është në procedurë ndarjeje.
Sipas dëshmisë zyrtare të siguruar nga procesverbali, në atë moment ka ardhur vëllai i ish-bashkëshortit, Adem Berbatovci, i cili është ndalur me veturë, ka hapur dritaren dhe është drejtuar nga ta me fjalët e rënda:
”Mirë është tuta ba se është dashtë në vakt mi qi nanën plumb në ballë e me myt krejt.”
”Nuk ndihem e sigurt as në banesën time”
E tronditur nga situata, viktima A.B. ka deklaruar para organeve të drejtësisë se nuk i ka kthyer fjalët në momentin e kërcënimit dhe nuk ka pasur kontakt fizik, por ka potencuar se pas këtij akti ndihet jashtëzakonisht e rrezikuar për jetën e saj dhe të tre fëmijëve që jetojnë me të.
Për shkak të frikës së madhe, ajo ka kërkuar urgjentisht urdhër mbrojtës nga gjykata.
”Po, do të doja të kisha urdhërmbrojtës për sigurinë time dhe të fëmijëve të mi, pasi që edhe në rrugë kam frikë të dal nga ta, gjithashtu as në banesën time nuk mund të rri rehat,” ka dëshmuar ajo, duke shtuar se ky sulm e ka shqetësuar rëndë në aspektin psikik.
”E di çfarë njerëz janë dhe çfarë bëjnë për pasuri”
E pyetur mbi motivet e këtij kërcënimi dhe historikun me familjen e ish-bashkëshortit, viktima ka qenë e prerë. Edhe pse me Ademin personalisht nuk ka pasur probleme më herët, ajo ka zbuluar një të kaluar me telashe të rënda me pjesën tjetër të familjes.
Rastet në Polici: A.B. ka pranuar se ka pasur disa raste të mëhershme të dhunës në familje, të cilat i ka të lajmëruara zyrtarisht në Polici.
Ajo ka deklaruar se frika buron nga fakti se tani po ndahet pasuria, duke shtuar: “Kam jetuar met ta dhe e di se çfarë njerëz janë dhe çfarë mund të bëjnë ata për pasuri.”
Në fund të deklaratës, ajo ka kërkuar që personat në fjalë të mos merren më me të dhe familjen e saj, duke lënë çështjen e pronës plotësisht në dorë të organeve kompetente.
Policia ka kontaktuar të denoncuarin, dhe i njejti ka thënë që do të lajmërohet neser.
Kush është “Tahir Fushë Kosova” ?
Tahir Berbatovci, i njohur në zonën e tij si “Tahir Fushë Kosova”, nuk është emër i panjohur për organet e drejtësisë në vend. Në maj të vitit 2021, ai ishte dënuar nga Departamenti Special i Gjykatës Themelore në Prishtinë pas pranimit të fajësisë për shmangie nga tatimi.
Ky dënim rridhte nga një megaproces gjyqësor ku një grup prej 15 personash akuzoheshin për organizim të skemave piramidale, bixhoz të paligjshëm, kontrabandë med mallra dhe shpëlarje parash që në tërësi kapnin vlerën e afro 10 milionë eurove.
Sipas aktakuzës së Prokurorisë Speciale, Berbatovci i kishte kryer këto shkelje ligjore përmes biznesit të tij “Hotel Kosvegas” (i njohur lokalisht si Las Vegas) në Fushë Kosovë, përgjatë periudhës 2014-2019. Atij i ishte shqiptuar një dënim med gjobë prej 1,500 eurosh dhe 1 vit burgim me kusht, me kushtëzimin që t’i kthente Administratës Tatimore të Kosovës (ATK) shumën e shmanguar prej 22,844.73 eurosh për të evituar burgun efektiv.
