Është zhdukur një 13-vjeçare nga Istogu, me banim në Gjermani.
Bëhet fjalë për të miturën Arta Hajzeraj, e cila është zhdukur që nga 27 qershori, në zonën “Lothar-Streit-Straße” të qytetit Zwickau në shtetin gjerman.
Klankosova.tv ka kontaktuar me dajën e saj në Kosovë, i cili ka thënë se vajza kishte shkuar po atë ditë në shkollë si çdo herë në orën 07:00 dhe nga ora 10:00 më nuk dihej gjë për të.
Për rastin në fjalë kanë shkruar edhe mediat lokale gjermane dhe poashtu edhe Policia e Gjermanisë është në kërkim të së miturës.
Arta në ditën që u zhduk, sipas mediave gjermane, kishte të veshur xhinse blu të çelët dhe një bluzë të zezë Adidas. Ajo mbante gjithashtu një çantë shpine Nike.
Policia gjermane është në kërkim të ndihmës nga të gjithë qytetarët atje që t’i kontaktojnë nëse dinë apo kanë parë ndonjë gjë nga momenti kur është zhdukur, Arta.
Mediat gjermane raportojnë se pos Artës, është zhdukur edhe një bashkëmoshatare e saj me emrin Sahar N. Edhe për të thuhet të jetë zhdukur rreth orës 10:00 në të njëjtën zonë ku raportohet se humbi edhe Arta.
Ndër tjera, raportohet se ekziston dyshimi që të miturat të kenë qenë bashkë kur janë zhdukur, por kjo ende nuk mund të thuhet se është e sigurt.
Policia e Zwickau ka vendosur numrin kontaktues: 0375 428102, që mund t’i lajmëroni. Kurse, ky është numri i familjes që mund të kontaktoni nëse dini gjë për Artën: 015754145810.
