Është mësuar identiteti i tre personave që dyshohen se ishin pjesë e një skeme të organizuar mashtrimi, përmes së cilës u tentua të tjetërsohej dhe shitej një pronë në vlerë prej 1 milion e 550 mijë eurosh në Sllatinë të Fushë Kosovës.
Burimet e Sinjalit bëjnë me dije se të dyshuarit janë:
- Erdall Muhaxheri rreth 26-vjeç
- Nexhdet Kida rreth 51-vjeç
- Agron Mrasori rreth 36-vjeç
Sipas hetimeve të Drejtorisë për Hetimin e Krimeve Ekonomike dhe Korrupsionit (DHKEK), ata dyshohet se, në bashkëkryerje me persona të arrestuar më herët në të njëjtin rast, kanë përdorur pasaportë të falsifikuar të Republikës së Serbisë, letërnjoftim dhe dokumente të tjera të falsifikuara, duke paraqitur një person me identitet të rremë si pronar legjitim të një parcele prej rreth 2 hektarësh në Sllatinë.
Sipas dosjes hetimore, prona ishte planifikuar të shitej përmes një noterie në Prishtinë, ndërsa blerësit dyshohet se do të mashtroheshin se dokumentacioni ishte i rregullt. Në këmbim të shitjes, grupi synonte të përfitonte 1,550,000 euro.
Hetimet kanë zbuluar gjithashtu se të dyshuarit dyshohet se kanë ndihmuar në hapjen e një xhirollogarie në Credins Bank, duke përdorur dokumente të falsifikuara dhe identitet të rremë, me qëllim realizimin e transaksionit.
Ndaj tyre janë iniciuar hetime për veprat penale, Mashtrim, Falsifikim të dokumenteve dhe Legalizim të përmbajtjes së rreme, të kryera në formë të bashkëkryerjes dhe ndihmës.
Pas intervistimit në prani të avokatëve mbrojtës, me vendim të Prokurorit të Shtetit, Erdall Muhaxheri dhe Nexhdet Kida janë dërguar në mbajtje për 48 orë, ndërsa Agron Mrasori është liruar në procedurë të rregullt.
Hetimet për këtë rast vazhdojnë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
