Vikendi i parë i shtatorit e sjell xhiron e katërt të Superligës në futboll.
Për dallim nga ajo e kaluara, këtë javë zhvillohen të gjitha ndeshjet, dy të shtunën, e tri të dielën.
Malisheva-Feronikeli 74, e Liria-Fushë Kosova e hapin këtë xhiro të shtunën e 2 shtatorit.
Malisheva kërkon të rikthehet tek fitorja, pas humbjes nga Prishtina, e cila ia ndali hovin e dy fitoreve rresht.
Nga ana tjetër, xhiron e kaluar, Feronikeli realizoi fitoren e parë kampionale, pas dy humbjeve.
Momentalisht, malishevasit janë të dytit në tabelë, derisa Nikli i gjashti.
Skuadra e vetme pa pikë deri më tani, Fushë Kosova, këtë javë i shkon në Prizren, Lirisë, që nga tri xhiro ka dy barazime e një humbje.
Prizrenasit luajtën pa gola ndaj Dukagjinit, e Fushë Kosova pësoi minimalisht nga Llapi.
Të dielën zhvillohet derbi i xhiros së katërt mes Llapit e Prishtinës në Podujevë.
Prishtina e ka nisur tejet mirë kampionatin, ka dy fitore e një barazim, kurse Llapi dy fitore e një humbje.
Kryeqytetasit mposhtën Malishevën, derisa llapjanët Fushë Kosovën. Dallimi mes tyre është një pikë.
Pas një jave pauzë, rikthehen së luajturi Drita e Ballkani ndaj kundërshtarëve të tyre.
Drita në shtëpi e pret Dukagjinin që ka vetëm një pikë nga tri ndeshje. Në anën tjetër, të kaltrit nga Gjilani kanë katër pikë, me një ndeshje më pak të luajtur.
Gjashtë pikë nga dy takime ka Ballkani që pritet të marrë edhe të tretën fitore ndaj Gjilanit, që ka nisur të organizohet, pas problemeve që i pati.
E të kuqtë nga Gjilani, kanë një barazim e një humbje, e një sfidë pa e luajtur, atë të javës së parë. Të gjitha përballjet e javës së katërt zhvillohen nga ora 16:00.
