Qeveria e Kosovës ka publikuar programin zyrtar të manifestimeve shtetërore për nder të 17 Shkurtit, ditës kur Kosova shënon 18-vjetorin e shpalljes së Pavarësisë.
Sipas agjendës për datën 17 shkurt 2026, aktivitetet do të nisin që në orët e hershme të mëngjesit dhe do të përmbyllen në mbrëmje me një koncert festiv.
Manifestimi do të fillojë në orën 07:00 me ceremoninë solemne të ngritjes së Flamurit të Republikës së Kosovës, për të vazhduar më pas me një mbledhje solemne të Qeverisë në orën 07:20.
Gjatë mëngjesit, krerët e shtetit do të kryejnë një sërë homazhesh për të nderuar figurat dhe sakrificën për liri. Këto përfshijnë nderime te Monumenti i të Pagjeturve, Pllaka Përkujtimore e Fëmijëve të Vrarë, si dhe homazhe te varri i ish-Presidentit Ibrahim Rugova dhe veprimtarit Adem Demaçi.
Në orën 09:00 parashihen homazhe në Kompleksin Memorial “Adem Jashari” në Prekaz.
Një nga momentet kryesore të ditës do të jetë parakalimi i trupave të Forcës së Sigurisë së Kosovës (FSK) dhe Policisë së Kosovës, i cili do të mbahet në orën 11:30.
Përveç këtyre, është paraparë seancë solemne e Kuvendit që pritet nis në orën 10:30, ndonëse Kosova aktualisht nuk ka Kuvend funksional. Vendi është në pritje të certifikimit të zgjedhjeve në mënyrë që të hapet rruga për konstituimin e legjislaturës së dhjetë.
Festimet zyrtare do të vazhdojnë pasdite me një pritje shtetërore të organizuar nga Presidentja, Kryetari i Kuvendit dhe Kryeministri në orën 17:30.
Dita festive do të përmbyllet në orën 20:00 me një Koncert Solemn nga Filharmonia e Kosovës.
Programi i plotë i manifestimeve shtetërore për shënimin e 18 vjetorit të Pavarësisë së Kosovës:
- 07:00 – Ngritja e Flamurit të Republikës së Kosovës
- 07:20 – Mbledhje solemne e Qeverisë së Republikës së Kosovës
- 07:30 – Nderime te Monumenti i të Pagjeturve
- 07:35 – Homazhe te Pllaka Përkujtimore e Fëmijëve të Vrarë
- 08:00 – Homazhe te varri i ish Presidentit Dr. Ibrahim Rugova
- 08:10 – Homazhe te varri i veprimtarit Adem Demaçi
- 09:00 – Homazhe në Kompleksin Memorial “Adem Jashari” në Prekaz
- 10:30 – Seancë solemne e Kuvendit të Republikës së Kosovës
- 11:25 – Nderime te Monumenti Heroinat
- 11:30 – Parakalimi i Trupave të Forcës së Sigurisë së Kosovës dhe Policisë së Kosovës
- 17:30 – Pritje shtetërore nga Presidentja, Kryetari i Kuvendit dhe Kryeministri i Republikës së Kosovës
- 20:00 – Koncert solemn i Filharmonisë së Kosovës
Pavarësia e Kosovës është shpallur më 17 shkurt 2008 nga Kuvendi i Kosovës. Pas votimit të aktit të Shpalljes së Pavarësisë, deputetët e Kuvendit të Kosovës, nënshkruan Deklaratën e Pavarësisë mbi një pergamenë mijëravjeçare.
Pergamena ku u shkrua Deklarata e Pavarësisë, Kosovës u dhurua nga Muzeu i Londrës.
Kosova është Republikë parlamentare dhe ka flamurin, stemën dhe himnin e saj.
