Komandanti i stacionit të Policisë në Obiliq, Zekirja Januzi, dhe zëvendësi i tij, Ajet Avdullahu, dyshohet se e kanë sulmuar dhe kanosur një polic të ri brenda stacionit policor në Obiliq.
Në lidhje me këto dyshime, KALLXO.com ka kontaktuar Inspektoratin Policor të Kosovës, i cili cili ka konfirmuar se ka pranuar ankesë dhe më 06.12.2024 ndaj dy zyrtarëve policorë të lartcekur kanë dorëzuar kallëzim penal në Prokurorinë e Prishtinës.
“Duke ju referuar kërkesës suaj ju konfirmojmë që IPK ka pranuar ankesë dhe ka iniciuar rast dhe se lidhur me të njëjtin rast më 6 dhjetor të vitit të kaluar hetuesit kanë dorëzuar kallëzim penal në Prokurorinë Themelore në Prishtinë ndaj dy zyrtarëve policorë të përfshirë si të dyshuar në këtë rast lidhur me veprat penale të sulmit dhe kanosjes”- njoftoi IPK-ja për KALLXO.com më 07.02.2025.
Ndërkohë, Prokuroria e Prishtinës nuk dha detaje për rastin, por konfirmoi se lënda është duke u shqyrtuar.
“Ju njoftojmë se lëndën në fjalë Prokurori i shtetit e ka pranuar me datë 13.12.2024, ndërsa lënda është ende në shqyrtim nga ana e Prokurorit dhe për veprimet hetimore do të njoftoheni me kohë.”-thuhet në përgjigjen e Prokurorisë së Prishtinës dërguar KALLXO.com më 06.02.2025.
KALLXO.com më 18.02.2025 ka takuar komandantin e stacionit policor në Obiliq, Zekirja Januzi, në mënyrë që ai të deklarohet për rastin.
Por, Januzi ka kërkuar që t’i drejtohemi me një kërkesë për intervistë Drejtorisë Rajonale të Prishtinës.
KALLXO.com ka dërguar kërkesë për intervistë me komandantin e Policisë, por deri në publikimin e artikullit, kërkesa nuk është aprovuar.
Më 19.02.2025 KALLXO.com ka biseduar përsëri më komandantin Zekirja Januzi, por i njëjti tha se për shkak se rasti është duke u trajtuar në një instancë tjetër, nuk mund të deklarohet.
