Numërimi i votave të zgjedhjeve të 7 qershorit ka përfunduar dhe tani pas ankesave, pritet certifikimi i rezultateve.
Derisa partitë po qëndrojnë në heshtje dhe po presin certifikimin e rezultateve, pikëpyetjet janë për formimin e institucioneve, nëse do të ketë marrëveshje apo koalicione mes partive, për president e qeveri.
Kryeministri në detyrë Albin Kurti, deklaroi të martën që do të jetë mirë që institucionet të formohen sa më parë.
Por, duke pasur Vetëvendosje aktualisht 53 mandate në Kuvend, cilët mund të jenë skenarët për formimin e qeverisë?
Lidhur me këtë, analisti politik, Halil Matoshi, në një prononcim për Gazeta Blic, vlerëson se nëse Kurti e formon qeverinë me pakicat joserbe, është shenjë se vendi do të shkojë në zgjedhje në vjeshtë, ndërsa nëse bashkëpunon me partitë tjera që krahas qeverisë të bëjë zgjidhje për presidentin, mund të shmangen zgjedhjet.
“Kjo do të dihet pas konstituimit të Kuvendit. Nëse Kurti formon Qeverinë i vetëm (me pakicat joserbe) para se shumica kuvendore me marrë iniciativë për Presidentin/Presidenten, kjo është shenjë se vendi shkon në zgjedhje të jashtëzakonshme në vjeshtë. Nëse ai, thërret grupet tjera politike për marrëveshje në mirëbesim që procesi i krijimit të Qeverisë të shkojë krahas atij për zgjedhjen e shefit të shtetit, ka gjasë të shmang zgjedhjet dhe t’i japë vendit stabilitet institucional”, është shprehur ai.
Por, sa mund të pritet nga Kurti që të bëjë marrëveshje me ndonjërën nga partitë dhe të mos kemi sërish zgjedhje?
“Kurti mësynë kontrollin e plotë të shtetit duke e zëvendësuar Kushtetutën me programin e partisë. Synimi i tij është partia-shtet dhe ndërrimi i drejtimit strategjik të Kosovës, duke i dhënë përparësi ideologjisë mbi gjeopolitikën!?” ka theksuar analisti për Gazeta Blic.
Sipas Matoshit, për Kurtin është kompromis që të fitojnë kushtet e tij, duke shtuar se Kurti nuk ndërron qasje, pasi çdo ndryshim është fillim i rënies së tij.
“Kompromisi për Kurtin është i tillë që të fitojnë kushtet e tij, nënshtrimi i grupeve tjera dhe etablimi i një autokracie duke shfrytëzuar vrimat kushtetuese, apo duke e sfiduar Kushtetutën, për dominim të plotë të shoqërisë dhe shtetit kosovar. Albin Kurti nuk ndërron qasjen, sepse çdo ndryshim domethënë fillim i rënies së tij!?” ka deklaruar Halil Matoshi.
