Në vend se ta penalizoj për projektin e lënë gjysmë, komuna e Mitrovicës e ka pajisur me leje ndërtimore kompaninë “Lin Projekt” Sh.P.K. për një projekt që do të ndërtohet në rrugën “Lah Nimani” në lagjjen “Qendra”.
Në vitin 2016 komuna e Mitrovicës në bazë të vendimit të Kuvendit Komunal kishte lidhur kontratë me operatorin ekonomik “Lin Projekt Sh.P.K & Arjeta Group Sh.P.K” për dhënien në shfrytëzim të pronës së paluajtshme të komunës prej 19691m² (gati 2 hektarë) me qëllim të ngritjes/ndërtimit të objekteve të kompleksit të Pishinave Olimpike, projekt që ishte paraparë të realizohet sipas kushteve urbane në bazë të Planit Rregullues Urban. Në qershor të vitit 2020 me kërkesë të operatorit ekonomik ishte lidhur aneks kontratë mes komunës së Mitrovicës dhe operatorik ekonomik, ku i ishin bartur të gjitha të drejtat e kontratës operatorik ekonomik “Lin Projekt”. Por që ky projekt akoma nuk ka përfunduar, edhe pse jemi tre vite pas afatit të paraparë për përfundimin e tij.
Në nenin 10 të asaj kontrate shkruan: “Kjo kontratë mund të shkëputet në çdo kohë nëse njëra prej palëve nuk respekton të drejtat dhe detyrimet e përcaktuara në këtë kontratë”.
Veriu.info ka hulumtuar tregun e patundshmërive në zonën përreth “Aqua Park-ut” dhe ka gjetur se çmimi i një ari tokë aty sillet nga 21 mijë deri në 40 mijë euo, ku një kalkulim i thjeshtë del se vlera reale e asaj toke që e ka marrë “Aqua Park” nga komuna është prej 4 deri 7.8 milionë euro.
Mirëpo, komuna le që nuk e ka penalizuar kompaninë “Lin Projekt” me shkëputje të kontratës, por ka vazhduar ta përkrah këtë kompani duke i dhënë leje ndërtimore në qendër te qytetit.
Përmes kërkesës për qasje në dokumente publike, Veriu.info ka siguruar lejen ndërtimore të lëshuar nga Drejtoria e Urbanizmit për kompaninë “Lin Projekt” Sh.P.K. më datë 18.08.2023 për ndërtimin e dy lamelave banesore.
E pazakonta e lëshimit të kësaj leje ndërtimore është se ajo është lëshuar në një afat të shpejt, pasi që “Lin Projekt” kishte bërë kërkesë për leje 28.07.2023. Pra, brenda tre jave është pajisur me leje ndërtimore, ani pse në dosjen e dokumentacionit të siguruar nga Veriu.info pëmes qasjes në dokumente publike, shihet se dokumentacioni i trajtuar nga Drejtoria e Urbanizmit për këtë leje ndërtimore ka plotë 49 faqe.
Shpeshherë dëgjojmë ankesat e qytetarëve që për një kërkesë nga më të thjeshtat të dorëzuara në komuna nuk marrin përgjigje deri në 30 ditë apo më shumë, por që për lëndën e lejes ndërtimore të “Lin Projektit” çuditërisht shihet se u punua shpejt.
Ndryshe, kompania “Lin Projekt” Sh.P.K. është në pronësi të Ferki Haxhimehmetit dhe Jusuf Haxhimehmetit, ky i fundit i njohur me emrin përkëdhelës të shoqërisë si “Cufa”.
Foto: Jusuf Haxhimehmeti
Nëni 12 i kontratës për dhënien e pronës së paluajtshme të komunës së Mitrovicësë në shfrytëzim afatgjatë (99 vite) për projektin e “Aqua Park-ut”, thuhet se pjesë përbërse e kontratës është edhe oferta e operatorit ekonomik, i cili në pikën/kapitullin 12 të ofertës ka treguar se si do ta bëjë investimin prej 4 milionë e 590 mijë euro (shih dokumentin e mposhtëm).
