Komuna e Mitrovicës vazhdon jotransparencën, as pas më shumë se 1 muaji nuk kthen përgjigje për arsyet e moszbatimit të vendimit për lirimin e hapësirave në qendrën e kulturës “Rexhep Mitrovica”

Ka më shumë se një muaj, më saktësisht nga 29 nëntori 2022, që kur Gazeta Online Veriu.info ka dërguar pyetje në adresë të komunës së Mitrovicës dhe ende nuk ka marrë përgjigje, për vendimin e drejtoreshës së Kulturës, Rinisë dhe Sportit për lirimin e hapësirave në qendrën e kulturës “Rexhep Mitrovica”.

Veriu.info raportoi për vendimin e drejtoreshës Valdete Idrizi për lirimin e hapësirave në qendrën “Rexhep Mitrovica” nga bizneset të cilave u ka skaduar kontrata e shfrytëzimit.

Ky vendim i DKRS i datës 17.10.2022 dhe ende nuk po gjen zbatim, pasi bizneset ende nuk janë larguar nga aty.

Ky është vendimi që mbanë nënshkrimin e drejtoreshës Valdete Idrizi:

Komuna e Mitrovicës ende nuk ka zbatuar këtë vendim, por në të njëjtën kohë as nuk tregohet transparente ndaj mediave duke mos kthyer përgjigje se cilat janë arsyet që ky vendim nuk po zbatohet.

Drejtoresha e DKRS, Valdete Idrizi, duket të mos ketë fuqinë politike për të zbatuar vendimet e saj.

Ndryshe ky nuk është rasti i vetëm kur komuna e Mitrovicës nuk tregohet transparente pasi ende nuk ka kthyer përgjigje në pyetjet e Veriu.info lidhur me zbatimin e kontratës së Lin Projekt në projektin e Aqua Park.