8 dhjetori ka qenë afati i fundit për të vendosur komunat lidhur me faljen e tatimit në pronë deri në vlerën prej 100 eurove.
Disa nga komunat e kanë miratuar këtë vendim e disa jo.
Shumica prej tyre kanë kërkuar nga Ministria e Financave të rimbursohet kjo shumë.
Ndryshe nga komunat e tjera që i kanë falur nga 100 euro, Prishtina ka vendosur që qytetarëve t’ua falë 75 euro tatim në pronë.
Se kur pritët të hy në fuqi ky vendim, cilat janë procedurat dhe për disa detaje të tjera për Front Online kanë folur nga Komuna e Prishtinës.
“Pas miratimit nga ana e Kuvendit Komunal të Prishtinës vendimi dërgohet në MAPL për procedura të ligjshmërisë dhe më pas do të jetë në fuqi”.
Kështu u bë e ditur për Front Online nga sektori i Tatimit në Pronë në Komunën e Prishtinës.
Në përgjigjen e tyre thuhet se ekzekutimi i parave do bëhet nga MF-ja nga ana e Departamentit të Tatimit në Pronë.
“Implementimin – ekzekutimi do të bëhet nga ana e Departamentit të Tatimit në Pronë në kuadër të Ministrisë së Financave Punës dhe Transfereve”, thuhet në përgjigjen e tyre për Front Online.
Nga kjy vendim i Komunës do të përfitojnë qytetarët që janë të regjistruar në tatimin në pronë.
“Përfitojnë të gjithë qytetarët që gjenden në regjistrin e tatimit në pronën e paluajtshme për vitin 2023 në territorin e Kryeqytetit”, tha ajo.
Nga Komuna e Prishtinës kanë treguar në detaje se si do të ndodh falja e 75 euro nga borxhi i faturës në tatimin në pronë.
Sipas tyre, aq sa e ka paguar tatimin në pronë qytetari gjatë 2023-tës aq do i kthehet shuma pa e kaluar shifrën 75 euro.
“Nëse totali i tatimit të vlerësuar për vitin 2023 për qytetarin është 100 euro do i falen 75 euro, po qe se i njëjti ka kryer obligimet për vitin 2023 atëherë 75 euro do jetë paradhënie për vitin 2024. Nëse totali i tatimit të vlerësuar për vitin 2023 për qytetarin themi se është 50 euro do i falen 50 euro, po qe se i njëjti ka kryer obligimet për vitin 2023 atëherë 50 euro do jetë paradhënie për vitin 2024.Nëse totali i tatimit të vlerësuar për vitin 2023 themi se është 30 euro do i falen 30 euro, po qe se i njëjti ka kryer obligimet për vitin 2023 atëherë 30 euro do jetë paradhënie për vitin 2024”, thuhet në përgjigjen e tyre për Front Online.
Gjykata Kushtetuese ka marrë vendim me 22 nëntor që komunat duhet të vendosin vetë për faljen e tatimit në pronë dhe se ligji i kontestuar nga komunat nuk është në kundërshtim me ligjin e pushtetit lokal.
