Komuna e Obiliqit ka shpallur fitues tenderit “Furnizim me pemë dhe perime për çerdhen ‘Rita Jonë’” kompaninë “Beni Dona Plast” Sh.P.K., për të cilin vendim pakënaqësi ka shprehur kompania e diskualifikuar “Burimi Corporation” Sh.P.K.
Në vendimin e nxjerrë nga Zyrtarja Përgjegjës i Prokurimit i Komunës së Obiliqit, Leonarda Emini, shihet se fitues i tenderit ka ofertuar me çmim 22 mijë 277 euro, përderisa operatori ekonomik i eliminuar “Burimi Corporation” Sh.P.K. ka oferuar me çmim prej 13 mijë 549 euro.
Pra, Komuna e Obiliqit që udhëheqet nga Xhafer Gashi i LDK-së ka eliminuar kompaninë me ofertë më të ulët, përderisa ka shpërblyer me kontratë kompaninë me ofertë mbi 60% më të lartë.
Veriu.info ka siguruar dokumentacionin e tenderit dhe komunikimet mes “Burimi Corporation” dhe Zyres se Prokurimit të Komunës së Obiliqit.
Çuditërisht në sqarimet pse është elinimuar “Burimi Corporation” nga ky aktivitet i prokurimit, Komuna e Obiliqit thotë se operatori ekonomik ka ofertuar me çmim shumë të ulët.
Tutje, në dokumentet e mëposhtme mund të shihni komunikimin ku Zyra e Prokurimit e Komunës së Obiliqit i kërkon “Burimi Corporation” rritjen e sigurimit të tenderit nga 10% në 30%, por që ky operator nuk pranon, duke u arsyetuar se rregullat nuk mund të ndryshohen në këtë fazë, pasi që në DT (Dosje të Tenderit) ishte kërkuar sigurim i tenderit prej 10%.
Pas njoftimit nga Zyra e Prokurimit për eliminim, “Burimi Corporation” njofton Komunën e Obiliqit se do të veproj sipas ligjit të prokurimit, duke lënë të kuptohet se do të vazhdoj me ankesë.
Në një prononcim për Veriu.info, Drejtori i “Burimi Corporation”, Arsim Zeqiri, tregon se autoriteti kontraktues (Komuna e Obiliqit) i ka kërkuar rritjen e sigurimi të tenderit në kundërshtim me Dosjen e Tenderit, gjë që të cilën ky nuk ka pranuar ta bëjë.
“Nuk kemi pranuar, sepse rregullat e përgjithshme nuk ndërrohen, pasi që në Dosje të Tenderit sigurimi i tenderit ka qenë 10%, ndërsa neve na kanë kërkuar ta bëjmë 30%. Ata nuk e kanë marrë parasysh që ne kemi kryer me sukses tender të tjerë. Pra, ne kemi furnizuar pikërisht këtë çerdhe për disa vite dhe kurrë s’kanë pasur asnjë vërejtje. Majde, dy fatura akoma nuk na i kanë pagu, edhe pse janë bërë rreth një vit prej dorëzimit të tyre”, ka thënë drejtori menaxhues i “Burimi Corporation” për Veriu.info.
Veriu.info ka tentuar të marrë përgjigje nga Komuna e Obiliqit për situatën e krijuar me rastin e eliminimit të operatorit ekonomik më të lirë, i cili në tri vitet e fundit e ka furnizuar suksesshëm pikërisht këtë çerdhe me pemë dhe perime, por deri në momentin e publikimit të këtij artikulli nuk kemi marrë përgjigje.
Pra, nga ky aktivitet i prokurimit është elinimuar operatori ekonomik me ofertën më të ulët, i cili suksesshëm e ka furnizuar me pemë dhe perime pikërisht çerdhen “Rita Jonë” në tri vitet e fundit, me arsyetimin se ka ofertuar me çmim ‘abnormalisht’ të ulët, ndërsa me tender është shpërblyer “Beni Dona Plast” me pronar Ragip Mustafën, biznesmenin qe është anëtar i Këshillit të Përgjithshëm të LDK-së, parti kjo e cila qeverisë me Komunën e Obiliqit.
Kush është në “Beni Dona Plast”?
“Beni Dona Plast” Sh.P.K. është kompani e njohur për fitimin e tenderëve në Kosovë, e njohur për afërsi të madhe me LDK-në. Kjo pasi që pronari i “Beni Dona Plast”, Ragip Mustafa, është anëtar i Këshillit të Përgjithshëm të LDK-së.
Mediat vitin e kaluar kishin raportuar për një seri dokumentesh që Ministria e Mbrojtjes ka arkivuar ndër vite për tenderin e ushqimit të ushtrisë që e mbante firma e multimilionerit Ragip Mustafa. Helmime të ushtarëve. Cilësi e dobët e ushqimit. Vërejtje që nuk përmirësoheshin. Shfrytëzim i ujit, rrymës, gazit e naftës së FSK-së edhe pse paguhej me kontratë, ishin disa prej gjetjeve.
Vitin e kaluar zyrtarë të lartë të Vetëvendosjes kishin akuza të shumta ndaj Ragip Mustafës për çështjen e furnizimit të FSK-së me ushqim, të cilit i referohen edhe si Ragip “Zhaba”.
