Komisioni Qendror i Zgjedhjeve njofton se në Qendrën e Numërimit dhe Rezultateve është duke vazhduar numërimi i fletëvotimeve që i takojnë votimit jashtë Kosovës për zgjedhjet lokale për kryetarë të Komunave dhe për Kuvende Komunale.
Deri të dielën në orën 16:00, janë numëruar 78 kuti në të cilat janë të vendosura pakot me fletëvotime të supozuara nga zgjedhjet për kryetarë të Komunave dhe 67 kuti të tjera nga zgjedhjet për Kuvende Komunale, përcjell Periskopi.
Nga 23 kuti postare, janë tërhequr 33,841 pako të supozuara me fletëvotime, të cilat i janë nënshtruar procesit të vlerësimit. Numri i pakove të supozuara me fletëvotime që janë aprovuar është 29,636, ndërkaq janë refuzuar 3,977.
Në njoftimin e KQZ-së poashtu u renditën disa arsye pse u refuzuan por megjithatë shumica kishin të bënin me mungesën e dëftesës së regjistrimit.
“3,660 raste – mungon dëftesa e regjistrimit; 1 rast – mungon dëftesa e regjistrimit dhe më shumë se 1 person/fletëvotim brenda zarfit; 4 raste – mungon dëftesa e regjistrimit dhe ka munguar pulla/vula postare; 122 raste – brenda zarfit më shumë se 1 person/fletëvotim; 69 raste – nuk është dërguar zarfi dhe fletëvotimi i dërguar nga KQZ; 1 rast – votuesi ka dërguar pakon nga shteti i ndryshëm nga ai i regjistrimit; 98 raste – mungon në zarf pulla/vula postare; 19 raste – brenda zarfit ka qenë vetëm dëftesa e regjistrimit, pa fletëvotim”, thuhet në njoftimin e KQZ-së.
