Komisioni Qendror i Zgjedhjeve (KQZ) është i përgatitur për organizimin e zgjedhjeve lokale.
Zëdhënësi i KQZ-së, Valmir Elezi, tha për Reporteri.net se institucioni që përfaqëson është në pritje të vendimit zyrtar nga Presidentja e Republikës për caktimin e datës së zgjedhjeve për kryetarë të komunave dhe kuvende komunale.
“Komisioni Qendror i Zgjedhjeve është në pritje të caktimit të datës për mbajtjen e Zgjedhjeve Lokale për Kryetarë të Komunave dhe për Kuvende Komunale dhe do të ndërmarrë të gjithë hapat ligjor për të filluar me përgatitjet e përgjithshme për organizimin e këtij procesi zgjedhor. ”, deklaroi Elezi.
Sipas tij, një nga veprimet e para që do të ndërmerren pas dekretimit të datës është miratimi i afateve dhe planit të aktiviteteve zgjedhore.
“Një nga hapat e parë që do të ndërmarrë KQZ është miratimi i afateve dhe planit të aktiviteteve zgjedhore. Vendosja e afateve dhe plani i aktiviteteve do të thotë përcaktim i saktë i kohës se kur fillon një aktivitet zgjedhor dhe koha se kur përfundon. Këto aktivitete, që ndërlidhen drejtëpërdrejt me votuesit, subjektet politike dhe vëzhguesit e zgjedhjeve”, sqaroi ai.
Presidentja Vjosa Osmani pritet që në ditët në vijim të zyrtarizojë datën e zgjedhjeve, pasi përfundoi raundin e konsultimeve me partitë politike.
