Të hënën në mëngjes, zyrtarët e shërbimit votues të Komisionit Qendror të Zgjedhjeve (KQZ) kanë nisur javën e fundit të shqyrtimit të aplikimeve për regjistrimin e shtetasve që jetojnë jashtë Kosovës për të votuar me postë në Zgjedhjet Lokale të 12 tetorit 2025.
Që nga data 23 korrik, zyrtarët kanë punuar çdo ditë nga ora 08:00 deri në mesnatë, duke shqyrtuar mijëra aplikime të paraqitura përmes platformës elektronike të KQZ-së.
“Prej më shumë se një muaji, në shtatë ditë të javës, dhjetëra zyrtarë të shërbimit votues, kanë shqyrtuar aplikimet për regjistrimin e votuesve jashtë Kosovës dhe brenda një kohe të shpejtë kanë kthyer përgjigje për çdo aplikues,” tha zëdhënësi i KQZ-së, Valmir Elezi.
Ai bëri të ditur se deri më 24 gusht, përmes platformës diaspora.kqz-ks.org janë pranuar 26,480 aplikime për regjistrim për votim me postë, nga të cilat janë aprovuar 21,291, ndërsa 5,186 janë refuzuar.
Sipas KQZ-së, arsyeja më e shpeshtë e refuzimeve është mungesa e dokumenteve që dëshmojnë adresën e aplikuesve jashtë Kosovës. Secilit aplikues i është dërguar një njoftim me arsyet e refuzimit dhe mundësinë për të riaplikuar duke plotësuar kushtet e nevojshme.
“Afati për regjistrim do të mbyllet këtë të premte, më 29 gusht”, ka sqaruar Elezi.
Krahasuar me zgjedhjet e fundit parlamentare të 9 shkurtit 2025, kur ishin regjistruar rreth 105 mijë votues nga diaspora, interesimi për këto zgjedhje është më i ulët. Megjithatë, krahasuar me zgjedhjet lokale të vitit 2021, numri i të regjistruarve është më i lartë.
“Numri i shtetasve të Kosovës të regjistruar për të votuar nga jashtë vendit është më i ulët se në Zgjedhjet për Kuvendin e Kosovës të 9 shkurtit 2025. Megjithatë, sipas të dhënave të deritashme është tejkaluar numri i votuesve të regjistruar në Zgjedhjet Lokale të vitit 2021, që ishte mbi 15,500”, tha Elezi.
Sipas KQZ-së, vetëm qytetarët që regjistrohen brenda afatit do të kenë të drejtë të votojnë përmes postës. Procesi i votimit për votuesit jashtë Kosovës do të zhvillohet nga 17 shtatori deri më 11 tetor 2025.
