Presidenti amerikan, Donald Trump, ka deklaruar në një postim në rrjetin e tij social Truth Social se beson në mundësinë e një marrëveshjeje paqeje midis Izraelit dhe Iranit, dhe ka theksuar rolin e tij në ndalimin e konflikteve të tjera të rëndësishme gjatë mandatit të tij të parë presidencial.
Trump u shpreh se, njësoj siç ndërmjetësoi marrëveshje midis Indisë dhe Pakistanit përmes fuqisë tregtare të Shteteve të Bashkuara, ai beson se edhe një zgjidhje mes Iranit dhe Izraelit është e arritshme. Sipas tij, tashmë janë duke u zhvilluar shumë takime dhe telefonata drejt kësaj rruge diplomatike.
“Irani dhe Izraeli duhet të bëjnë një marrëveshje, dhe do ta bëjnë. Shumë bisedime po zhvillohen tani”, shkroi Trump.
Ai përmendi gjithashtu ndërhyrjen e tij për ndalimin e përshkallëzimit të konfliktit mes Serbisë dhe Kosovës, duke theksuar se situata ishte pranë shpërthimit në një luftë, por ai arriti të vendoste një ndalesë. Trump kritikoi presidentin aktual Joe Biden për “vendime të pamenduara” që, sipas tij, kanë dëmtuar progresin e arritur, por u zotua se “do ta rregullojë sërish”.
