Ferit Idrizi mandatin e kryetarit të komunës së Vushtrrisë të fituar në fund të vitit 2021 e nisi me plot gojën tranparencë, por duket që transparent është vetëm në promovimin e vendimeve populliste, por jo edhe atyre që me ligj e ka obligim të jap qasje.
Më 11 korrik 2024 Veriu.info ka kërkuar qasje në dokumentet publike të komunës së Vushtrrisë në bazë të Ligjit për Qasje në Dokumente Publike, me saktësisht qasje në dokumentet e emërimeve, shkarkimeve, lirimeve nga detyra dhe dorëheqjeve të drejtorëve të Drejtorisë së Prokurimit për periudhën 01.01.2022 deri 10.07.2024.
Edhe pse të obliguar me ligj, komuna që udhëhiqet nga Ferit Idrizi nuk i dha qasje në dokumente publike gazetës Veriu.info, ani pse edhe përmes e-mailit i pari i komunës ishte i informuar.
Më pas gazeta Veriu.info bëri ankesë në Agjencinë për Privatësi dhe Informim, duke i bashkëngjitur edhe gjitha dëshmitë se si Komuna e Vushtrrisë e ka shkelur ligjin, duke mos na dhënë qasje në dokumente publike.
Agjencia për Privatësi dhe Informim aprovoj ankesën e Veriu.info dhe detyroj komunën e Vushtrrisë të jap qasje në dokumente publike, dokumente të cilat komuna i dërgoj në API dhe kjo e fundit na i përcolli në redaksi.
Nga dokumentet e sigurara, shihet se kryetari Ferit Idrizi për 2 vite e gjysmë në krye të komunës, ka bërë shtatë herë (7) emërime të drejtorëve e UD të drejtorëve të Drejtorisë së Prokurimit, që njihet në publik edhe si drejtoria e ‘tenderëve’.
Në rrethana normale kjo tregon se ai ka qenë shumë i pakënaqur me punën e drejtorëve të Prokurimit. Por duke pasur parasysh se si disa herë i ka rimëruar të njëjtit person si drejtorë apo UD drejtor, atëherë kjo ngjallë dyshime tjera!
Drejtorët e emëruar dhe liruar nga Drejtoria e Prokurimit nga Ferit Idrizi nga 8 dhjetor 2021 deri më 4 qershor 2024 janë:
Hyda Dallku më 8 dhjetor 2021 emërohet drejtor i Drejtorisë së Prokurimit. Lirohet nga detyra më 18 korrik 2022.
Xhafer Islami më 1 gusht 2022 emërohet drejtor i Drejtorisë së Prokurimit. Lirohet nga kjo pozitë më 9 shtator 2022.
Albanez Tahiraj më 9 shtator 2022 emërohet drejtor i Drejtorisë së Prokurimit. Lirohet nga kjo pozitë më 27 tetor 2023, pasi që emërohet po në këtë datë drejtor i Drejtorisë së Arsimit.
Azize Krasniqi më 27 tetor 2023 emërohet UD e Drejtoreshës së Prokurimit. Lirohet nga kjo pozitë më 8 dhjetor 2023.
Ilmi Azemi më 4 dhjetor 2023 emërohet drejtor i Drejtorisë së Prokurimit. Lirohet nga kjo pozitë më 15 maj 2024, pasi që është emëruar në këtë datë drejtor i Drejtorisë për Ekonomi dhe Investime Kapitale.
Azize Krasniqi emërohet Drejtoreshë e Drejtorisë se Prokurimit më 14 maj 2024. Lirohet nga kjo pozitë më 4 qershor 2024.
Çuditërisht Ilmi Azemi rimërohet drejtor i Drejtorisë së Prokurimit më datë 4 qershor 2024, vetëm tre javë pasi që ishte liruar nga kjo detyrë prej kryetarit Ferit Idrizi, të cilin nuk dihet çka e shtyri që tariemëroj si drejtor.
VENDIMET:
