Gjermania planifikon të marrë hua më shumë se 800 miliardë euro deri në vitin 2030 për të financuar një program të gjerë riarmatimi, duke shënuar një ndryshim historik nga politika tradicionale e disiplinës fiskale që vendi ka ndjekur për dekada.
Sipas një raporti të Financial Times, qeveria e kancelarit Friedrich Merz synon të rrisë ndjeshëm investimet në mbrojtje, në përgjigje të sfidave të reja të sigurisë në Evropë.
Parashikimet tregojnë se buxheti i mbrojtjes do të arrijë në 109 miliardë euro në vitin 2027, ndërsa deri në vitin 2030 pritet të rritet në 183.6 miliardë euro.
Përveç rritjes së shpenzimeve për mbrojtjen, Berlini planifikon të akordojë edhe 11.6 miliardë euro ndihmë ushtarake për Ukrainën gjatë vitit të ardhshëm.
Ministri gjerman i Financave, Lars Klingbeil, mbrojti kursin e ri ekonomik të qeverisë, duke theksuar se Gjermania nuk mund të përballet me kërcënimet që vijnë nga Rusia duke iu përmbajtur politikës së njohur si “Schwarze Null” (Zero e Zezë), e cila parashikon mbajtjen e një buxheti të balancuar dhe kufizimin e borxhit publik.
Plani i ri sinjalizon një ndryshim të rëndësishëm në politikën financiare dhe të sigurisë së Gjermanisë, ndërsa Berlini synon të forcojë ndjeshëm kapacitetet e tij ushtarake në vitet e ardhshme. /Panorama
