Një skenë prekëse është regjistruar në kufirin egjiptian, ku një infermier nga Britania e Madhe iu lut me lot në sy forcave egjiptiane që të lejonin hyrjen e një karvani humanitar në Rripin e Gazës.
“Ku e keni zemrën?”, u dëgjua të thoshte ai, teksa kërkonte me ngulm leje për të çuar ndihma për civilët palestinezë që po përballen me krizë humanitare.
Karvani, i përbërë nga aktivistë ndërkombëtarë pro-palestinezë dhe punonjës humanitarë, u ndalua të premten si nga autoritetet egjiptiane, ashtu edhe nga ato të Libisë Lindore. Në Libi, autoritetet shkuan edhe më tej, duke ndaluar lëvizjen e grupit dhe duke u ndërprerë atyre lidhjen me internetin, sipas burimeve lokale.
Qëllimi i karvanit ishte të dërgonte ndihma të domosdoshme për popullsinë civile në Gaza, ku situata humanitare është përkeqësuar ndjeshëm për shkak të bllokadës izraelite dhe sulmeve të vazhdueshme.
Pengesat e vendosura nga autoritetet lokale u kritikuan ashpër nga aktivistët dhe organizatat ndërkombëtare, të cilat kërkojnë qasje të lirë dhe të sigurt për ndihmat humanitare në Gaza.
Protesta dhe thirrje për solidaritet me popullin palestinez janë duke u zhvilluar në disa vende të botës, ndërsa presioni ndaj qeverive rajonale për të lejuar ndihmën humanitare po rritet çdo ditë.
