Zërat se burimi i parë i hantavirusit ishte një landfill mbeturinash në Ushuaia është hedhur poshtë nga shkencëtarët e Tierra del Fuego. A2 CNN shkruan se me zbarkimin dhe nisjen e karantinës për pasagjerët e anijes turistike MV Hondius, janë rikthyer pyetjet mbi origjinën e shpërthimit të hantavirusit që po shqetëson botën. Ku u infektua “pacienti zero”, holandezi i apasionuar pas vëzhgimit të shpendëve, i cili u sëmur pak ditë pas hipjes në anije dhe vdiq më 11 prill?
Pesë muaj udhëtim para imbarkimit
70-vjeçari Leo Schilperoord kishte udhëtuar për pesë muaj me bashkëshorten e tij përpara se të hipte në MV Hondius. Çifti kishte mbërritur në Argjentinë më 27 nëntor 2025 dhe kishte bërë udhëtime me makinë në Argjentinë, Kili dhe Uruguai, përpara se të mbërrinte në Tierra del Fuego, rajoni jugor nga ku anija u nis më 1 prill 2026.
Deri tani nuk ka siguri se si ai u infektua me virusin e Andeve, një variant i hantavirusit që qarkullon në disa zona të Kilit dhe Argjentinës. OBSH po heton mundësinë që infektimi të ketë ndodhur përpara hipjes në anije. Sipas drejtorit të përgjithshëm të OBSH-së, Tedros Adhanom Ghebreyesus, çifti kishte vizituar zona ku jeton lloji i minjve që shërben si rezervuar i virusit.
Hipoteza e landfillit në Ushuaia
Javën e kaluar, Associated Press raportoi se autoritetet argjentinase po shqyrtonin mundësinë që çifti të ishte afruar pranë një landfilldi në Ushuaia, i mbushur me brejtës dhe i frekuentuar nga zogj grabitqarë që ushqehen me ta.
Sipas kësaj teorie, turisti holandez mund të ketë thithur grimca nga jashtëqitjet e brejtësve të infektuar, veçanërisht nga një lloj miu që konsiderohet bartës i hantavirusit të Andeve që gjendet te pasagjerët e anijes së infektuar.
Mohimi i autoriteteve lokale
Autoritetet shëndetësore të Tierra del Fuego e kanë minimizuar këtë teori. Juan Facundo Petrina, drejtori i epidemiologjisë dhe shëndetit mjedisor në provincë, deklaroi se në këtë rajon nuk është regjistruar asnjë rast hantavirusi që nga viti 1996.
Sipas tij, në Tierra del Fuego nuk jeton lloji i brejtësit që mbart virusin e Andeve, i cili gjendet rreth 1500 kilometra më në veri, në Patagoni. Për më tepër, kushtet klimatike të rajonit nuk favorizojnë mbijetesën e virusit dhe izolimi gjeografik i provincës e bën të vështirë mbërritjen e brejtësve bartës.
Ku mund të ketë ndodhur infektimi?
Sipas analizës së periudhës së inkubacionit, infektimi mund të ketë ndodhur mes 16 shkurtit dhe 13 marsit, shumë javë para mbërritjes së çiftit në Ushuaia. Dyshohet se ata mund të jenë infektuar gjatë qëndrimit në zonat malore të Patagonisë, në provincat Chubut, Neuquén ose Río Negro.
Autoritetet argjentinase po kryejnë teste te brejtësit përgjatë itinerarit të udhëtimit të çiftit holandez për të identifikuar burimin e mundshëm të transmetimit.
Megjithatë, ekspertët nuk e përjashtojnë plotësisht mundësinë që infektimi të ketë ndodhur në Tierra del Fuego, pasi ndryshimet klimatike dhe ekologjike mund të ndikojnë në përhapjen e specieve bartëse të virusit.
Nga korriku 2025, Argjentina ka regjistruar 101 raste me hantavirus dhe 32 viktima. Në periudhën 2024-2025 u regjistruan 64 raste dhe 14 vdekje, ndërsa në 2023-2024 kishte pasur 82 raste dhe 13 viktima.
