Këngëtarja Vesa Smolica ka reaguar pas publikimit dhe shpërndarjes së videove intime që kanë qarkulluar së fundmi në rrjet, duke i kushtuar një shkrim Klaudia Hilës, bashkëshortes së kompozitorit Adrian Hila.
Përmes një postimi në rrjetet sociale, Smolica ka rrëfyer një kujtim personal nga adoleshenca, duke treguar se në moshën 14-vjeçare kishte qëndruar për rreth katër muaj në shtëpinë e familjes Hila, në kohën kur ishte pjesë e spektaklit “Këngët e Shekullit”.
Duke iu referuar situatës së krijuar së fundmi, këngëtarja ka thënë se nuk mund të qëndronte pa folur për Klaudia Hilën, të cilën e ka njohur nga afër gjatë asaj periudhe.
“Prandaj sot, kur po shoh gjithë këtë që po ndodh, nuk mund të mos flas për gruan që unë kam njohur vetë. Klaudia, unë nuk i kam harruar të mirat që më ke bërë”, ka shkruar Smolica.
Ajo ka shprehur gjithashtu mbështetje për vajzat e familjes Hila, duke theksuar se ato nuk duhet të mbajnë mbi vete peshën apo gjykimin për veprimet e një personi tjetër.
Reagimi i Vesës vjen në një kohë kur publikimi dhe shpërndarja e materialeve intime ka nxitur reagime të shumta në opinionin publik, ndërsa autoritetet shqiptare vijojnë hetimet për rrethanat e regjistrimit dhe shpërndarjes së tyre.
REAGIMI I PLOTE:
Ca fjalë për Klaudian, Meryl dhe Ketlin. Familjen Hila e kam njohur që në kohën e “Gjeniut të Vogël”, por edhe më afër gjatë eksperiencës në “Këngën e Shekullit”. Kur pranova ftesën për spektaklin “Këngët e Shekullit” isha vetëm 14 vjeç, larg prindërve dhe familjes time, kur për katër muaj qëndrova në shtëpinë e familjes Hila. Dhe disa gjëra nuk harrohen. Klaudia Hila më mbajti pas vetes si vajzën e saj. Shkoja me të çdo mëngjes në Teatrin e Kukullave, në punën e saj. Jetoja me familjen e saj, haja në tryezën e tyre nga duart e saj dhe flija në një dhomë me vajzat e saj. Në një moshë kur kisha më shumë nevojë për siguri, ajo më dha pikërisht atë.
Prandaj sot, kur po shoh gjithë këtë që po ndodh, nuk mund të mos flas për gruan që unë kam njohur vetë. Klaudia, unë nuk i kam harruar të mirat që më ke bërë. Ti ndoshta më kujton ende si vajzën e vogël 14-vjeçare që dikur erdhi në shtëpinë tënde. Por ajo vajzë sot është rritur dhe ende e mban mend me mirënjohje gruan që e bëri të ndihej e sigurt larg shtëpisë. Ti je një grua dhe një nënë burrneshë. Meryl e Ketlin nuk duhet të mbajnë mbi vete peshën, turpin apo gjykimin e veprimeve të askujt tjetër. Klaudia, në këto ditë të vështira, dua vetëm tëtë them: mos harro kush je dhe mos harro sa njerëz e dinë kush ke qenë dhe je për ta. Unë jam një prej tyre. Të kam njohur atëherë. Nuk të harroj sot.
Të uroj forcë. Të uroj dinjitet. Të uroj të gjesh brenda vetes atë grua të fortë që unë e kam njohur atëherë dhe që, besoj, ke qenë gjithmonë. Me dashuri Vesa.
