Kryeministri i Kosovës, Albin Kurti u ka bërë thirrje të rinjve e të rejave të komunitetit joshumicë, që të aplikojnë në thirrjet e hapura për punësim në institucionet publike të vendit tonë.
Ai ka shpërndarë dhe një video, ku flet më në detaje lidhur me këtë çështje.
“Para këtij adresimi, keni mund të shihni e dëgjoni përmes fushatës “Shpërndaje barazinë”, shumë tregime frymëzuese të bashkëqytetarëve tanë nga komunitetet rom, ashkali dhe egjiptian në Kosovë, të cilët kanë shumë vite që janë duke kontribuar për të fuqizuar edhe më tutje të gjitha institucionet tona publike. Por njëherësh, edhe shumë histori sfidash e vështirësish”, thotë Kurti në video.
“Qeveria e Kosovës bashkë me organizatën “Zëri i Romëve, Ashkalinjëve dhe Egjiptianëve” e nisi këtë fushatë për t’iu bërë thirrje të gjithë të rejave dhe të rinjve nga këto komunitete që të përfshihen aktivisht dhe në jetën publike, përveçse ato shoqërore”.
“Takimet, bisedat e ndërveprimet e rregullta me ushtarë të FSK-së, policë të Kosovës, shërbyes civilë, e personel mjekësor nga radhët e komuniteteve joshumicë, çdo ditë e më shumë ma thellojnë bindjen për kontributin qenësor që ata kanë për shtetin, republikën, dhe shoqërinë tonë”.
“Ne e kemi themeluar ekipin ndërinstitucional për promovimin dhe punësimin e komuniteteve të nënpërfaqësuara me synim që të përmbushim dhe të respektojmë kuotën prej 10 për qind, siç parashihet me ligjet tona”, u shpreh i pari i qeverisë.
