Kryeministri në detyrë, Albin Kurti dy ditë më parë kërkoi nga organet e drejtësisë dhe sigurisë hetime për huqjet e rezultateve të EXIT POLL-it në natën e zgjedhje lokale më 12 tetor.
Mirëpo jo më larg se në muajin prill partia që i prin ai, Lëvizja Vetëvendosje e kishte paguar njërën prej këtyre kompanive për sondazhe.
Në raportet financiare të fushatave zgjedhore të audituara që i ka publikuar Komisioni Qendror i Zgjedhjeve të mërkurën, del se Vetëvendosja e ka paguar UBO Consulting me 17 mijë e 700 euro më 4 shkurt 2025.
Këto para kanë hyrë te shpenzimet e reklamave, reprezencacionit dhe konferencave.
Ndërkaq, të hënën, Kurti tha se EXIT POLL-et nuk përbëjnë thjesht “një huqje”, por një “inxhiniering të paramenduar për ndërhyrje flagrante në procesin zgjedhor”.
“Ajo çka ndodhi më 12 tetor rreth raportimeve për Mitrovicën, duhet hulumtuar e hetuar. Nuk bëhet fjalë vetëm për një huqje por për një inxhiniering të paramenduar për ndërhyrje flagrante në procesin zgjedhor”, ka thënë ai.
“Exit Pollet e prezantuara gabimisht me 16 pikë të përqindjes dallim e më tepër nga më shumë se një organizatë dhe për të njëjtën komunë – dhe postimi i lajmeve të rreme se kush ishte fituese ende pa u mbyllur vendvotimet, nuk janë thjesht një huqje. Kjo është cenim i demokracisë, i zgjedhjeve të lira dhe integritetit e i sigurisë të shtetit tonë. I ftoj organet e sigurisë dhe drejtësisë që të merren me këtë çështje”, tha Kurti.
