Kryeministri i Kosovës, Albin Kurti, së bashku me ministrin në detyrë të Financave, Punës dhe Transfereve, Hekuran Murati, priti të enjten një delegacion të Odës Ekonomike të Gjenevës, të udhëhequr nga kryetari i saj, Vincent Subilia.
Në njoftimin zyrtar bëhet e ditur se gjatë takimit, delegacioni u informua mbi ecurinë ekonomike të Kosovës dhe indikatorët makroekonomikë, ku u theksua se vendi ka shënuar një rritje mesatare vjetore prej 6% të BPV-së në katër vitet e fundit, ndërsa në tremujorin e parë të vitit 2025, rritja ishte 3.6%.
Përfaqësuesit e Odës Ekonomike u njohën edhe me përparësitë e Kosovës për investime të huaja, përfshirë koston e ulët operative, popullatën e re, aftësitë gjuhësore dhe kompetencat në fushën e teknologjisë dhe inovacionit. Po ashtu, u përmend nota kreditore BB- e dhënë nga Fitch Ratings dhe e rikonfirmuar në vitin 2024.
Një pjesë e rëndësishme e diskutimeve iu kushtua rolit të diasporës në zhvillimin ekonomik të vendit, veçanërisht përmes investimeve në prodhim, eksport dhe ngritje të brendit kombëtar.
Në përfundim, palët shprehën gatishmëri për thellim të bashkëpunimit ekonomik dhe përfshirjen konkrete të bizneseve nga Gjeneva në sektorë kyç në Kosovë.
