Kryeministri në detyrë, Albin Kurti, ka refuzuar përsëri të flasë para gazetarëve, në hyrje të Kuvendit të Kosovës, pak para nisjes së seancës konstituive që pritet të mbahet në orën 11:00.
I shoqëruar nga truprojat, Kurti u pyet për situatën e krijuar rreth bllokadës institucionale, por si në rastet e kaluara, nuk dha asnjë koment.
Seanca e sotme shënon tentativën e 20’të për ta konstituuar Kuvendin, një proces që vazhdon të ngecë për shkak të mungesës së konsensusit rreth zgjedhjes së Kryetares së Kuvendit.
Lëvizja Vetëvendosje vazhdon të qëndrojë pas kandidaturës së Albulena Haxhiut, por ajo po kundërshtohet nga partitë e tjera parlamentare. Deri tani, më së shumti që Haxhiu ka arritur të marrë janë 57 vota, katër më pak se numri i nevojshëm për t’u zgjedhur – 61.
