Kryeministri në largim, Albin Kurti ka njoftuar se është takuar me ushtruesin e drejtorit të QKUK-së, Osman Hajdari, të cilit të mërkurën iu sulmua vetura.
Kurti në një shkrim në Facebook, ka folur për “krim të organizuar” dhe “aksion me elemente terroriste”, duke thënë se këto nuk trembin “drejtorët tanë”.
“Se krimi i organizuar dhe aksionet me elemente terroriste nuk i trembin drejtorët tanë e dëshmon deklarata publike e djeshme e z. Osman Hajdari, U.D. i Drejtorit të QKUK-së.
Bashkë me ministrin në detyrë të Shëndetësisë, Arben Vitia e takuam sot atë si dhe Drejtorin e ShSKUK-së, Elvir Azizi.
E dënoj ashpër sulmin ndaj drejtorit Hajdari dhe i bëj thirrje organeve të rendit e të drejtësisë që sa më parë të zbardhin rastin dhe kryesit e këtij akti kriminal të sillen para përgjegjësisë” – ka shkruar ai.
Tutje, ai ka folur për “reforma të thella”, që sipas tij i ka ndërmarrë qeverisja e tij.
“Në çdo institucion publik kemi ndërmarrë reforma të thella që në thelb kanë mbrojtjen e interesit publik e shërbime më të mira për qytetarët. Këto reforma kanë prekur interesa të ngushta të klaneve të ndryshme të instaluara për më shumë se 20 vjet në çdo pore të institucioneve tona.
Por, akte të tilla jo vetëm që nuk na ndalin, por na bëjnë edhe më këmbëngulës në punët e mira që po bëjmë”.
