Në Kosovë, ndërhyrjet estetike si Botox dhe fillerët po përhapen me shpejtësi, por një pjesë e madhe e tyre ofrohet jashtë ligjit dhe pa mbikëqyrje profesionale. Në muajin dhjetor, me autorizim të Prokurorisë Themelore në Prishtinë, Drejtoria e Hetimeve të Krimeve Ekonomike e Policisë së Kosovës, në bashkëpunim me Inspektoratin Shëndetësor, kishte zhvilluar një aksion të gjerë për kontrollimin e bizneseve që ofrojnë shërbimin e injektimit të Botox-it, pasi që asnjë subjekt juridik në Kosovë nuk është i autorizuar për ofrimin e këtij shërbimi.
Në mesin e subjekteve private shëndetësore të kontrolluara kishte qenë edhe subjekti privat shëndetësor “Teuta’s Beauty and Spa Center”, me themeluese Dr. Teuta Tunuzliu.
Në rrjetet sociale dhe në promovime, ky subjekt privat shëndetësor prezantohet me emrin “Teute Advanced Aesthetics”, ku edhe jepen sqarime për profesionin e Teuta Tunuzliut, për të cilën thuhet se është farmaciste dhe specialiste e kozmetologjisë.
Sipas raportit të inspektimit, gjatë inspektimit të kryer nga inspektorët shëndetësorë në bashkëpunim me Drejtorinë për Hetimin e Krimeve Ekonomike të Policisë së Kosovës, “Teuta’s Beauty and Spa Center” nuk ka prezantuar licencën e institucionit, me arsyetimin se nuk ka aplikuar pasi që nuk e posedojnë qasjen për persona me aftësi të kufizuara. Pra, ky subjekt privat shëndetësor i themeluar nga Dr. Teuta Tunuzliu është zbuluar duke punuar pa licencë.
Në raport bëhet e ditur se në hapësirat e “Teuta’s Beauty and Spa Center” janë gjetur aparate dhe produkte mjekësore injektabile, si: fillerë dermalë, adrenalinë, desloratadinë dhe lidokainë.
Inspektorët në raport kanë theksuar se nga themeluesja Teuta Tunuzliu u është thënë se shërbimet shëndetësore në “Teuta’s Beauty and Spa Center” ofrohen nga Dr. Ylber Zejnullahu dhe Dr. Allma Kocinaj.
Po ashtu, në raport thuhet se në fund të inspektimit, Inspektorati Shëndetësor, me procesverbal me nr. 0013953, ndaloi ofrimin e shërbimeve shëndetësore nga subjekti privat shëndetësor “Teuta’s Beauty and Spa Center Sh.p.k.”, që operonte në rr. Luan Haradinaj në Prishtinë.
Për shkak të këtyre të gjeturave, Inspektorati Shëndetësor, me vendimin 05-63, ka gjobitur “Teuta’s Beauty and Spa Center” me 4 mijë euro.
Veriu.info ka tentuar të marrë një qëndrim nga “Teuta’s Beauty and Spa Center” për çështjet e ngritura, por deri në momentin e publikimit të artikullit nuk kemi pranuar përgjigje në pyetjet e dërguara.
Në një përgjigje të marrë nga Ministria e Shëndetësisë për këtë rast më 5 mars, thuhet se ky institucion privat shëndetësor ka paguar gjobën, por nuk është i licencuar.
LEXONI EDHE:
