Arblind Pireva, personi që dyshohet se qëndron pas vrasjes së rëndë që tronditi Prishtinën mbrëmjen e së martës.
Burimet e Sinjalit bëjnë me dije se ai dyshohet se e qëlloi për vdekje Agron Hajdarin në rrugën “Rifat Berisha”, ku viktima mori plagë të rënda nga arma e zjarrit në kokë, gjoks dhe shpinë.
Ngjarja u raportua rreth orës 20:40, pasi Policia kishte pranuar informacion për të shtëna me armë zjarri dhe një person të plagosur.
Njësitë policore dhe ekipi emergjent kanë dalë menjëherë në vendin e ngjarjes, ku mjekët konstatuan se viktima kishte ndërruar jetë si pasojë e plagëve të marra.
Lidhur me rastin janë intervistuar katër persona në cilësinë e dëshmitarëve dhe bazuar në deklarimet e tyre, organet e hetimit kanë identifikuar si të dyshuar Arblind Pirevën.
I njëjti është në arrati, por pritet arrestimi nga Policia e Kosovës.
Në vendin e ngjarjes kanë dalë njësitë relevante hetimore, Kryeprokurori dhe prokurorja kujdestare, ndërsa është angazhuar edhe njësia K9, pasi deri në këtë fazë nuk është gjetur asnjë gëzhojë dhe ende nuk dihet lloji i armës së përdorur në krim.
Pas ekzaminimeve nga ekipet forenzike, trupi i pajetë është dërguar në Institutin e Mjekësisë Ligjore për obduksion.
Me urdhër të Prokurorit të Shtetit, rasti është iniciuar si “Vrasje e rëndë”, ndërsa hetimet për zbardhjen e plotë të motiveve dhe rrethanave të ngjarjes po vazhdojnë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
