Prokuroria Themelore në Mitrovicë njofton se ka ngritur aktakuzë, kundër një zyrtari të Gjendjes Civile në Komunën e Vushtrrisë për shkak të dyshimit të bazuar për kryerjen e veprës penale “Keqpërdorimi i detyrës zyrtare apo autoritetit zyrtar“ dhe ndaj një qytetari për kryerjen e veprës penale “Legalizimi i përmbajtjes së rreme”, transmeton Veriu.info.
Sipas njoftimit të Prokurorisë, i pandehuri H.R, akuzohet se në cilësinë e zyrtarit të gjendjes civile ka regjistruar në sistemin elektronik të gjendjes civile katër persona, me të dhëna fiktive.
Veriu.info mëson se zyrtari komunal i gjendjes civile në Komunën e Vushtrrisë ndaj të cilit është ngritur aktakuzë është Haki Rrustemi.
Siç mëson Veriu.info, Haki Rrustem tashmë në fakt është ish zyrtar komunal, pasi që i njëjti është pensionuar kohë më parë.
“I pandehur H.R., akuzohet se në katër (4) raste në vitet 2016-2017, në cilësinë e personit zyrtar – zyrtar i gjendjes civile në komunën e Vushtrrisë, me qëllim të përfitimit të dobisë pasurore për vete apo personave tjerë, si dhe shkeljes së drejtave të personave tjerë, ka shfrytëzuar detyrën apo autoritetin e tij zyrtar, ka tejkaluar kompetencat e tij zyrtare, në atë mënyrë që në kundërshtim me Ligjin për gjendjen civile nr.04/L-003, Ligjit për shtetësinë e Kosovës dhe udhëzimet administrative ka regjistruar në sistemin elektronik të gjendjes civile katër (4) persona, me të dhëna fiktive, pa qenë të regjistruar në librat amëz të lindjes, dhe kështu i ka pajisur kundërligjshëm me numër personal dhe dokumentacion”, thuhet në njoftimin e PTH të Mitrovicës.
Ndërsa i pandehuri L.V., akuzohet se me datë 19 qershor 2017, në zyrën e regjistrimit civil, i njëjti ka vënë në lajthim organin kompetent – zyrën e regjistrimit civil në komunën e Vushtrrisë dhe ka vërtetuar një çështje të pa vërtetë në atë mënyrë që pa qenë i regjistruar në librat amëz të lindjes në gjendjen civile, me dokument të falsifikuar ka arritur të regjistrohet dhe të marrë numrin personal dhe të pajiset me dokumentacion.
Me këto veprime, të pandehurit H.Rr., dhe L.V., kanë kryer veprën penale e cila u vihen në barrë./Veriu.info
