Me arsyetimin se është koha e shkurtër dhe votuesve jashtë Kosovës mund të mos iu arrijnë me kohë fletëvotimet në adresën ku jetojnë, Kryetari i KQZ-së, Kreshnik Radoniqi ka kundërshtuar publikisht që diasporës t’iu dërgohen fletëvotimet origjinale.
Të njëjtën gjë e kanë bërë dhe dy përfaqësuesit e Lëvizjes Vetëvendosje në KQZ-së, Alban Krasniqi dhe Sami Kurteshi.
Në adresimin e tij, i pari i KQZ-së ka treguar pse është kundër.
“Jemi të sigurt në bazë të përgjigjes nga Posta e Kosovës dhe DHL që ky operacion ka me dështuar. Kemi raportimin se kjo nuk mundet me u përfunduar. Janë në pyetje 3 milionë e 722 mijë euro që janë të parapara që të dështojnë. Unë nuk jam i interesuar t’i djeg tre milionë euro… Çështja është se dy institucione që e transmetojnë postën na kanë deklaruar me shkrim zyrtarisht se dërgesat nuk shkojnë ose shkojnë diku kah 7 janar. Me këtë njohuri tash ne dhe me insistua me harxhua të gjitha ato para është absurde. Janë para që mund të harxhohen pa asnjë shërbim”, ka thënë ai.
Pretendimet e tij i ka kundërshtuar anëtari i KQZ-së nga PDK-ja, Arianit Elshani.
“Mes asaj që po thoni ju dhe çka thuan në raport është se atje shkruan se është e vështirë me u kontraktua. Së paku ka hamendësime dhe nuk është e konstatuar, pasi ti nuk je nënshtruar një procesi të tillë. E dyta, ti po thua që nuk e nënshkruaj, ose është ajo që po thotë raporti ose ajo që po themi këtu në mbledhje. Nëse raporti thotë se është e vështirë me u kontraktua, ky duhet me qenë konstatimi dhe jo ‘nuk e nënshkruaj’ pasi kërkesa ka me pas për me realizua këtë aktivitet”, theksoi ai.
Rregullorja e KQZ-së për votim jashtë vendit e obligon KQZ-në që votuesve jashtë Kosovës të regjistruar për votim me postë t’u dërgoj përmes postës fletëvotimin, zarfin e fshehtësisë dhe zarfin kthyes.
Në mbledhjen e sotme KQZ-ja mori vendim për miratimin e planit të buxhetit për organizimin e zgjedhjeve të parakohshme për Kuvendin e Kosovës, të cilat do të mbahen më 28 dhjetor. Buxheti i planifikuar dhe miratuar për këto zgjedhje është në vlerën: 11,493,526 Euro. Vlera përfundimtare e buxhetit të planifikuar përfshin edhe miratimin e amendamentit të propozuar gjatë mbledhjes që parasheh dërgimin e pakove me fletëvotime në adresë të votuesve, të cilët do të regjistrohen për të votuar përmes postës.
