Mitrovica po përballet me mungesë të ujit që prej mëngjesit të djeshëm.
Siç mëson “Jepi zë”, qytetarët do të nisin të furnizohen me ujë tek sonte rreth orëve të fundit të ditës së sotme.
Kryeshefi i Ibër-Lepencit, Faruk Mujka, ka konfirmuar për gazetën se janë duke punuar që ujin ta lëshojnë në kanal deri në orën 20:00.
Por, që nga lëshimi i ujit në kanal të Ibër-Lepencit, duhen disa orë për të arritur në fabrikën e Ujësjellësit, e tek më pas tek qytetarët.
Sipas informacioneve, uji mund të arrijë tek qytetarët pas orës 22:00 e deri në mesnatë.
Siç u raportua më herët, mungesa e ujit erdhi pasi fabrika e Ujësjellësit nuk po mund ta përpunojë ujin për shkak të turbullirës.
E turbullira, sipas Ibër-Lepencit, u shkaktua nga rrëshqitja e dheut në një by-pass që u krijua në Zubin Potok pasi aty po kryhen punime në kanalin kryesor.
Ndërkohë, zjarrfikësit kanë vendosur dy autobotë për të furnizuar qytetarët me ujë.
