Largimi i Xabi Alonsos mund të mos ketë sjellë ende shumë ndryshime në fushë, por pritet të ketë ndikim jashtë saj. Me ardhjen e Alvaro Arbeloas, marrëdhëniet mes tij dhe skuadrës së Real Madridit nisin nga e para, ndërsa kjo situatë mund të hapë gjithashtu rrugën për të ardhmen e Vinicius Juniorit.
Braziliani ka vetëm 18 muaj të mbetur në kontratën e tij dhe “Los Blancos” tashmë kanë një ofertë në tryezë për të. Ajo është e pranishme që nga pranvera e kaluar, por kampi i Viniciusit po kërkon një pagë të barabartë me atë të Kylian Mbappe. Megjithatë, largimi i Alonsos mund të krijojë hapësirë për negociata të reja.
Bisedimet kanë qenë të ngrira që nga vera, kur Vinicius rriti kërkesat e tij, por sipas Cadena SER, Real Madridi po shqyrton mundësinë e rifillimit të negociatave para fundit të janarit. Edhe pse klubi operon me bindjen se Vinicius nuk do të vendosë firmën para përfundimit të sezonit, drejtuesit besojnë se ai përfundimisht do të rinovojë kontratën. Real Madridi është i vendosur ta mbajë Viniciusin, ndërsa edhe vetë lojtari ka deklaruar gjithmonë publikisht se dëshiron të qëndrojë në “Bernabeu”.
Më herët gjatë sezonit ishte raportuar se Vinicius i kishte lënë të kuptohej presidentit Florentino Perez se nuk do ta konsideronte rinovimin e kontratës për sa kohë Xabi Alonso do të qëndronte në krye të skuadrës. Vinicius ndjeu se ishte trajtuar padrejtësisht nga Alonso në fillim, dhe pakënaqësitë e tij dolën hapur në ndeshjen ndaj Barcelonës, kur u zëvendësua duke bërtitur: “Më mirë të largohem”.
Vinicius kërkoi falje për sjelljen e tij, por jo ndaj Alonsos, dhe ishte një nga lojtarët që nuk i dha lamtumirën publike trajnerit. Edhe pse në publik pretendohej se marrëdhëniet ishin përmirësuar, dyshja nuk dukej se kishte marrëdhëniet më të mira mes vete.
