Ekonomisti Adem Qorrolli ka reaguar ashpër pas largimit nga puna të gazetares së Radio Televizioni i Kosovës, Edina Avdiu, duke e quajtur rastin një sinjal alarmi për të drejtat e punëtorëve dhe për lirinë e shprehjes në një medium publik.
“Kur Qeveria e Kosovës bëhet shkelësi më i madh i të drejtave të punëtorit, atëherë padrejtësia institucionalizohet dhe zëri i punës heshtet.”
Sipas tij, RTK-ja ka larguar nga puna gazetaren Edina Avdiu “pa paralajmërim, përmes një emaili ku i është komunikuar se nuk mund të hyjë më në objekt”. Qorrolli shkruan se, sipas pretendimeve të gazetares, “ky vendim është marrë pa një akt zyrtar të drejtorit dhe pa procedurë të rregullt disiplinore”, çka, nëse vërtetohet, do të përbënte shkelje të rëndë të standardeve ligjore dhe të së drejtës së punës.
Ai ka nënvizuar faktin se bëhet fjalë për një gazetare shtatzënë, “e cila ka mbi tre vite punë në RTK dhe ka raportuar nga ngjarje me rrezikshmëri të lartë, përfshirë zhvillimet në Banjska dhe protestat në Mitrovicë, si dhe shumë raste të tjera me rëndësi të veçantë për publikun”. Sipas Qorrollit, largimi i saj nga puna ka ardhur pasi ajo “kishte ngritur zërin për pagën e saj dhe për të drejtat e kolegëve”.
“Nëse kjo rezulton e vërtetë, atëherë kemi të bëjmë me një precedent të rrezikshëm për lirinë e fjalës brenda një mediumi publik. Një institucion që financohet nga qytetarët duhet të garantojë transparencë, barazi dhe respektim të ligjit jo të ndëshkojë zërat kritikë. Më shqetësuese është fakti se, sipas pretendimeve, nuk ka pasur reagim nga Inspektorati i Punës apo nga Prokuroria.”
Qorrolli shprehet veçanërisht i shqetësuar për mungesën e reagimit institucional. “Më shqetësuese është fakti se, sipas pretendimeve, nuk ka pasur reagim nga Inspektorati i Punës apo nga Prokuroria”, thekson ai. Në këtë kontekst, ai kujton se “një nënë shtatzënë, që në këtë periudhë ka nevojë për qetësi dhe mbrojtje ligjore, sot përballet me pasiguri dhe me dyer të mbyllura në vendin e saj të punës”.
https://www.facebook.com/share/p/1Nx3dVxqhp/?mibextid=wwXIfr
