Fatmir Limaj përmes një shkrimi në Facebook pasi në partinë e tij aderuan “Forumi Intelektual E30” tha se rritja e Nismas Socialedemokrate “është strategjike”.
“Me këtë hap, forcojmë themelet e një force politike që e vendos në qendër qytetarin, shtetin e së drejtës dhe zhvillimin ekonomik të qëndrueshëm”, tha ai.
Postimi i plotë:
Forumi Intelektual E30 i bashkohet strukturave të NISMA Socialdemokrate!
NISMA Socialdemokrate shënon një tjetër moment të rëndësishëm në rrugëtimin e saj politik: Forumi Intelektual E30 është bërë pjesë përbërëse e strukturave tona.
Ky aderim, në prag të kuvendit zgjedhor që do të mbahet të dielën, është dëshmi e qartë se alternativa që përfaqëson NISMA po fuqizohet me njerëzit më të përgatitur, me kuadro të respektuara dhe me energji të reja që besojnë në vlerat tona themelore.
Pjesëmarrja aktive e Prof. Dr. Artan Nimanit dhe e bashkëpunëtorëve të tij në strukturat e NISMA-s përbën një kapital të çmuar politik dhe intelektual për partinë tonë dhe për vendin.
Rritja e NISMA-s nuk është vetëm numerike; ajo është cilësore, strategjike dhe e bazuar në një vizion të qartë për të ardhmen e Kosovës. Me këtë hap, forcojmë themelet e një force politike që e vendos në qendër qytetarin, shtetin e së drejtës dhe zhvillimin ekonomik të qëndrueshëm.
