Kreu i Nismës, Fatmir Limaj, ka reaguar në 20-vjetorin e aktgjykimit lirues ndaj tij nga Gjykata e Hagës, duke theksuar se lufta e Ushtrisë Çlirimtare të Kosovës (UÇK) ishte e drejtë dhe në mbrojtje të popullit të Kosovës. Ai e cilësoi ballafaqimin gjyqësor në Hagë si një proces të gjatë dhe sfidues, ku Kosova nuk ishte shtet dhe mungonte mbrojtja e duhur juridike.
“Ballafaqimi ynë gjyqësor në Hagë ishte i gjatë dhe sfidues. Në atë kohë Kosova nuk ishte shtet dhe ne ishim pa asnjë përkujdesje institucionale, pa mbrojtje të organizuar, ashtu siç do të duhej ta kishim në një proces të tillë gjyqësor. Edhe ne si individë, edhe e vërteta e luftës sonë çlirimtare, për herë të parë po sfidoheshin në nivelet e drejtësisë ndërkombëtare në Hagë. Në gjithë këtë proces e kishim të vërtetën e UÇK-së dhe mbështetjen e popullit.”, tha ai.
Limaj theksoi se edhe pas 20 vjetësh, lufta çlirimtare vazhdon të sfidohet në Hagë, duke iu referuar gjykimeve ndaj bashkëluftëtarëve të tij. Ai shprehu besimin se akuzat dhe shpifjet ndaj UÇK-së do të mbarojnë dhe se bashkëluftëtarët do të kthehen të lirë.
I shqetësuar për mungesën e mbrojtjes institucionalo-historike të Kosovës, Limaj u shpreh se është trishtuese që shteti i Kosovës po bën pak për të mbrojtur të vërtetën e luftës çlirimtare, mbi të cilën është ndërtuar shteti. Ai përfundoi me një thirrje për nderim dhe respekt për UÇK-në dhe dëshmorët e kombit.
“Përjetësisht krenar me luftën tonë çlirimtare; ajo nuk mund të njolloset; ajo është e pastër si loti. Rroftë UÇK-ja! Lavdi dëshmorëve të kombit!”, përfundoi ai.
