Gjykata Themelore në Mitrovicë ka vendosur sot, të hënën (02.02.2026), lirimin e të gjithë kryesuesve të Qendrave Komunale të Numërimit (QKN), të cilët ishin ndaluar nën dyshimet për manipulim të votave në zgjedhjet e parakohshme parlamentare të dhjetorit 2025.
Vendimi i Gjykatës vjen një ditë pasi Prokuroria Themelore e Mitrovicës kishte paraqitur kërkesë për caktimin e masës së paraburgimit ndaj dhjetë kryesuesve të QKN-ve, të përfshirë në procesin e numërimit të votave në komunat e Mitrovicës së Jugut, Mitrovicës së Veriut, Leposaviqit, Zubin Potokut dhe Zveçanit.
Prokuroria kishte njoftuar se hetimet ishin iniciuar mbi dyshimet për parregullsi dhe manipulim gjatë numërimit të votave të zgjedhjeve të parakohshme parlamentare të mbajtura më 28 dhjetor 2025. Në kuadër të këtyre hetimeve, gjithsej 43 kryesues të QKN-ve ishin intervistuar në stacionet policore në Mitrovicë të Jugut dhe Mitrovicë të Veriut, ndërsa 34 prej tyre ishin ndaluar për 48 orë, 21 në jug dhe 13 në veri të qytetit.
Megjithatë, pas shqyrtimit të kërkesës së Prokurorisë dhe materialeve të paraqitura, Gjykata ka vendosur që të mos caktojë masën e paraburgimit, duke i liruar të gjithë të ndaluarit.
Njoftimi nga Gjykata:
Të pandehurit mbrohen në liri
Mitrovicë, 2 shkurt 2026 – Gjykata Themelore në Mitrovicë, Departamenti për Krime të Rënda, njofton se sot ka mbajtur tri (3) seanca dëgjimore lidhur me kërkesat e Prokurorisë Themelore në Mitrovicë për caktimin e masës së paraburgimit ndaj dhjetë (10) të pandehurve.
Pas shqyrtimit të kërkesave dhe vlerësimit të provave të paraqitura, Gjykata ka refuzuar kërkesat e Prokurorisë Themelore në Mitrovicë për caktimin e masës së paraburgimit ndaj të pandehurve: R.J., L.H., N.D., A.N., B.F., H.S., Sh.N., Y.S., D.K. dhe S.S., duke vendosur që të njëjtit të mbrohen në liri.
Të pandehurit dyshohen se, secili veç e veç, kanë kryer veprën penale “Falsifikimi i rezultateve të votimit”, nga neni 216 paragrafi 2, lidhur me nenin 31 të Kodit Penal të Republikës së Kosovës.
Gjykata ka vlerësuar se, në këtë fazë të procedurës penale, nuk janë përmbushur kushtet ligjore për caktimin e masës së paraburgimit, sipas dispozitave të Kodit të Procedurës Penale të Republikës së Kosovës.
