Ministrja në detyrë e Industrisë, Ndërmarrësisë dhe Tregtisë, Rozeta Hajdari dhe dy zyrtarëve të po kësaj ministrie, Hafiz Gara e Irfan Lipovica, janë akuzuar nga Prokuroria Speciale se i kanë shkaktuar miliona euro dëm buxhetit të shtetit, me rastin e blerjes së mallit për rezervat shtetërore.
Më 10 dhjetor 2025 nis gjykimi për korrupsion në rastin e “Rezervave shtetërore” ndaj ministres në detyrë të Industrisë, Ndërmarrësisë dhe Tregtisë, Rozeta Hajdari, si dhe ndaj Irfan Lipovicës, Hafiz Garës dhe Ridvan Muharremit.
Gazeta Metro ka siguruar listën e plotë të dëshmitarëve që do të lexohen në proces, ku ndër këta emra është edhe ai i Albin Kurtit, Kryeministër në shkuarje.
Prokuroria Speciale e Republikës së Kosovës (PSRK) i akuzon Hajdarin, Lipovicën dhe Garën për “Keqpërdorim të pozitës apo autoritetit zyrtar” dhe “Zbulim të fshehtësisë zyrtare”, ndërsa Muharremin për “Ndihmë në kryerjen e veprës penale të keqpërdorimit të pozitës apo autoritetit zyrtar”. Sipas aktakuzës, buxheti është dëmtuar për 2,912,134.78 euro.
Këta dyshohet se kanë negociuar dhe nënshkruar kontrata me kompani të huaja për grurë, vaj dhe sheqer, ku disa mallra nuk janë pranuar dhe çmimet ishin më të larta se mesatarja e tregut.
Dëshmitarët në proces janë:
Albin Kurti
Nezir Idrizi
Besarta Binaku
Rexhep Bllaca
Ermal Kutllovci
Ekrem Avdyli
Adem Krasniqi
Bexhet Asllanaj
Mensur Azemi
Daut Latifaj
Mevlyde Beqiri
Enver Hajrullahu
Rabije Kosumi
Sead Shehu
Agron Sadiku
Gazeta Metro posedon shënimet e kompletuara të personave në fjal, por për ruajtje të privatësisë nuk i ka publikuar.
Prokuroria Speciale e Republikës së Kosovës më 11 nëntor 2025 ka ngritur aktakuzë ndaj ministres në detyrë të Industrisë, Ndërmarrësisë dhe Tregtisë, Rozeta Hajdari, si dhe ndaj Irfan Lipovicës, Hafiz Garës e Ridvan Muharremit lidhur me rastin e njohur si “Rezervat shtetërore”.
Ministrja Hajdari, ish-zëvendëssekretari i MINT, Irfan Lipovica, si dhe drejtori i Departamentit të Rezervave Shtetërore në MINT, Hafiz Gara, akuzohen për kryerjen e veprave penale “Keqpërdorim i pozitës apo autoritetit zyrtar” dhe për “Zbulim të fshehtësisë zyrtare”. Ndërsa, afaristin Ridvan Muharremi i njohur si “Ridi”, PSRK-ja po e akuzon për kryerjen e veprës penale “Ndihmë në kryerjen e veprës penale të keqpërdorimit të pozitës apo autoritetit zyrtar”.
Bazuar në aktakuzën e PSRK-së, të pandehurit Rozeta Hajdari në cilësinë e ministres së Industrisë, Ndërmarrësisë dhe Tregtisë, Irfan Lipovica si zëvendëssekretar dhe Hafiz Gara në pozitën e Drejtorit të Departamentit të Rezervave Shtetërore, në kundërshtim me Ligjin për Prokurim Publik, duke iu shmangur procesit të konkurrencës, me procedurë të negocimit kishin negociuar dhe më pas nënshkruar kontratën me kompaninë turke “Yafe Turizm Indaat Sanayi ve Ticaret Anonim Sirketi” me seli në Bursa të Turqisë, për blerjen e 10 mijë tonë grurë me çmim prej 4,834,778.00 euro. Aty thuhet se çmimi për blerje të grurit ishte kontraktuar 193.48 euro më i lartë sesa çmimi mesatar i tregut.
Në aktakuzë më tej thuhet se të pandehurit Hajdari, Lipovica dhe Gara kanë negociuar dhe nënshkruar kontratë edhe me kompaninë “Xanto SP. ZO. O” me seli në Gdynia të Polonisë për blerjen e 200 mijë litra vaj dhe 120 mijë kilogramë sheqer. Mirëpo, përkundër pagesës së kryer, malli nuk ishte pranuar asnjëherë.
Hajdari, Lipovica, Gara ngarkohen se zbuluan fshehtësinë zyrtare duke ia vënë në dispozicion Muharremit informatën për vendndodhjen e deponimit të grurit si mall i rezervës shtetërore.
Rasti i rezervave shtetërore
Më 2023, tre persona u arrestuan për rastin e rezervave shtetërore.
Në mesin e tyre kanë qenë edhe punonjës të Ministrisë së Industrisë, Ndërmarrësisë dhe Tregtisë (MINT), që udhëhiqet nga Rozeta Hajdari, e cila, gjatë paraqitjes për dëshmi në Prokurorinë Speciale, ka zgjedhur të mbrohet në heshtje.
Në këtë Ministri, më 2023, u kryen bastisje pas publikimit të audio-incizimeve nga portali Nacionale, ku ishte pretenduar se një sasi vaji, e blerë në Poloni, dhe një sasi gruri, e blerë në Turqi, nuk kishin arritur kurrë.
Hajdari ka thënë se blerjet për rezerva shtetërore ishin bërë në përputhje me ligjin, por nuk ka dhënë më shumë hollësi, meqë informacionet për to janë sekrete shtetërore.
Ajo e ka akuzuar policinë se gjatë bastisjeve, ka marrë në cilësinë e provave dokumente të klasifikuara si sekrete shtetërore.
Kurti i ka dalë në mbrojtje Hajdarit, duke thënë se “nuk ka kurrfarë korrupsioni e keqpërdorimi”.
Çka tha vetë Hajdari për aktakuzën?
Ministrja në detyrë e Industrisë, Ndërmarrësisë dhe Tregtisë, Rozeta Hajdari, ka mbajtur konferencë për media më 14.11.2025 rreth aktakuzë së ngritur ndaj saj nga Prokuroria Speciale e Kosovës (PSRK).
Sipas Hajdarit të gjitha provat që PSRK i ka mbledhur për ngritje të aktakuzës për rastin e rezervave shtetërore janë marrë në mënyre të kundërligjshme.
Sipas saj, hetuesit e PSRK kanë marrë prova ndonëse nuk kishin certifikatë të sigurisë, duke u mundësuar atyre qasje në dokumente që janë të klasifikuar si sekret shtetëror.
Sipas Hajdarit, rrezikimi i sigurisë shtetërore është bërë nga vetë PSRK gjatë hetimit të rastit.
“Të gjitha provat e Prokurorisë Speciale janë mbledhur jashtëligjshëm përmes hetuesve që kanë zbatuar urdhrin e prokurorit Valdet Gashi i cili i ka dërguar në MINT pa certifikatë të sigurisë. Kjo ndodhi në gusht të vitit 2023 ku dy policë hetues pa certifikatë të sigurisë, pa leje të qasjes në këto dokumente të klasifikuara, kanë marrë materialin brenda një ore në Departamentin të rezervave shtetërore të mallrave në kuadër të MINT-it duke u thirrë në autorizimin e prokurorit Valdet Gashi”.
Hajdari tutje përmendi edhe prokurorët specialë që kanë ngritur aktakuzën për këtë rast, duke specifikuar me emra e mbiemra, Valdet Gashin dhe Milot Krasniqin, për të cilët tha se nuk kanë të fituar asnjë rast gjyqësor nga ngritjet e aktakuzave.
Sipas ministres në detyrë, kompanitë që nuk i kanë sjellë mallrat që janë të destinuara për rezerva shtetërore tashmë janë paditur dhe paratë që janë paguar për mallra do të kthehen.
