Kryeministri në detyrë, Albin Kurti, në një intervistë të dhënë më 18 maj 2026 deklaroi se kryetari i Komunës së Skenderajt kishte tentuar, me veturë zyrtare, të ndërhynte në mënyrë të rrezikshme në qarkullimin e eskortës së tij.
Sot Lushtaku ka publikuar raportin zyrtar të Policisë lidhur me rastin, ku, pos tjerash, shihet se mbrojtja e afërt e Kurtit ka deklaruar se vetura në të cilën është ndodhur kryetari i komunës nuk e ka rrezikuar eskortën dhe nuk ka pasur rrezik të drejtpërdrejtë.
Për këtë, Lushtaku ka thënë se ‘deklarata e Kurtit ka qenë një gënjeshtër e fabrikuar për përfitime politike dhe për të njollosur emrin e tij para qytetarëve’.
Ky është reagimi i tij i plotë:
As sulm, as rrezikim. Vetëm shpifje dhe gënjeshtër e Albin Kurtit.
E gjeni të bashkëngjitur raportin zyrtar të Policisë, i cili e nxjerr në pah të vërtetën dhe e demanton plotësisht shpifjen dhe propagandën e Albin Kurtit për kinse “sulm me makinë” ndaj tij dhe eskortës përcjellëse.
Raporti thotë qartë se nuk ka pasur as sulm ndaj eskortës dhe as rrezikim të sigurisë në komunikacion. Pra, gjithçka ka qenë një gënjeshtër e fabrikuar për përfitime politike dhe për të njollosur emrin tim para qytetarëve.
Unë nuk jam mësuar të fshihem pas mashtrimeve e deklaratave propaganduese. Gjithmonë kam qëndruar drejt para Zotit, familjes dhe qytetarëve. Prandaj sot, faktet flasin vetë.
Askush nuk mund të shpifë e të manipulojë opinionin publik e të kalojë pa u përballur me përgjegjësi. Për këtë gënjeshtër publike dhe këtë shpifje të ulët, Albin Kurti do të përgjigjet para gjykatës!
