Maliqi tha se Aleanca ka mbajtur një qëndrim të pandryshuar ndaj Lëvizjes Vetëvendosje, duke përjashtuar mundësinë e një koalicioni me këtë parti.

“AAK-ja ka qenë kosistente vazhdimisht në këtë situatë edhe në zgjedhjet e kaluara. AAK e ka pasur qëndrimin se nuk hyn në asnjë koalicion me Lëvizjen Vetëvendosje, për shkak të arsyeve të cilat i ka dhënë Ramush Haradinaj. Sa i përket çështjes së presidentit në një rrethanë të tillë Ramush Haradinaj do të ishte ideal si kandidat për president të vendit. Por duke e pasur parasysh se cila është partia që ka fituar më së shumti vota, dhe cila është fuiqia e Aleancës, e shoh shumë të pamundur këtë”, tha Maliqi.

Sipas Maliqit, një nga arsyet kryesore që e bën të vështirë një marrëveshje mes AAK-së dhe LVV-së janë përplasjet e vazhdueshme politike mes Ramush Haradinajt dhe Albin Kurtit.

“Ramush Haradinaj ka qenë shumë i ashpër ndaj Albin Kurtit dhe nuk ka pasur asnjë moment që t’i ndryshojë deklaratat e tij. Ai ka thënë se Kurti është person i rrezikshëm dhe se Kosova po fundoset për shkak të keqqeverisjes së tij. Madje, pashë që edhe Albulena Nagavci ia ripërsëriti këto deklarata kur u pyet nga gazetarët. Pra, Lëvizja Vetëvendosje nuk ia fal Haradinajt këto deklarata”, u shpreh Maliqi më tej.