Presidentja e Kosovës, Vjosa Osmani e ka shpallur 28 dhjetorin 2025 – datë për mbajtjen e zgjedhjeve të jashtëzakonshme parlamentare.
Lidhur me këtë ka reaguar analisti politik Halil Matoshi, i cili tha se Presidentja Osmani është shndërruar në notere të Albin Kurtit, dhe se këtë po e bën me vetëdije të plotë.
Sipas Matoshit, Osmani në vend të Kushteutës të Kosovës, po udhëheq me programin e Lëvizjes Vetëvendosje dhe po i jep zë “agitropit” nga zyra e Dejona Mihalit.
“Presidentja Osmani, me vetëdije të plotë është shndërruar në notere të Albin Kurtit dhe nuk po e mbështetë atë pavetëdije, siç konstatoi gabimisht një gazetar. Zonja Osmani duke harruar vetëpërmbajtjen institucionale dhe unitetin e popullit që përfaqëson, në vend të Kushtetutës kosovare e ka adoptuar Programin e Lëvizjes Vetëvendisje dhe po i jep zë agitpropit nga zyra e Dejona Mihalit”, tha ai.
Tutje, ai theksoi se data 28 dhjetor nuk e sheh si të gabuar, por si të duhur edhe për faktin që mund të ketë më shumë votues edhe nga mërgata, të cilët e gëzojnë të drejtën të votojnë në vendin e tyre, por gjithashtu të bëhet kritike ndaj Qeverisë Kurti, ti bëjë presion që të garantojë dy tre vende në Kuvend për ta.
“Porse, data 28 dhjetor për zgjedhjet e jashtëzakonshme nuk është një gabim, mirë që ka zgjedhur këtë ditë që supozohet se mund të ketë më shumë votues, përfshi mërgaten kosovare, e cila ka të drejtë kushtetuese të votojë në atdhe”.
“Mërgata duhet të mendojë më shumë për vete se për pushtetin e Kurtit, pra duke bërë presion që të ndryshohet Ligji për zgjedhjet duke garantuar dy – tre vende në Kuvend për mërgatë, një nga Europa, një nga Amerika, si dhe një nga Kanada me Australi e Zelandë të re! Vetëm kështu do t’i jepte zë intersave dhe kërkesave të veta”-përfundoi Matoshi për GazetaBlic.
