Ardhja e Kylian Mbappés te Real Madridi krijoi pritshmëri të mëdha, dhe pas 100 ndeshjeve me fanellën e bardhë, krahasimet me Cristiano Ronaldon janë bërë pothuajse të pashmangshme.
Të dy kanë lënë gjurmë të mëdha te klubi, por fillimi i Mbappés është shoqëruar me më pak suksese kolektive.
Që nga ardhja e tij nga Paris Saint-Germaini, Real Madridi ka fituar vetëm Superkupën e UEFA-s dhe Kupën Interkontinentale të FIFA-s.
Megjithatë, edhe fillimi i Ronaldos nuk ishte i mbushur me trofe: në sezonin e parë nuk fitoi asgjë, ndërsa në të dytin vetëm Kupën e Mbretit.
Sa i përket statistikave individuale, Ronaldo vendosi standard shumë të lartë që në fillim, me 95 gola (19 nga penalltitë) në 8,160 minuta.
Mbappé, nga ana tjetër, ka shënuar 85 gola (16 nga penalltitë) dhe ka dhënë 23 asistime në rreth 8,464 minuta.
Golat e Mbappés shpërndahen kështu: 55 në La Liga, 22 në Ligën e Kampionëve, 4 në Kupën e Mbretit, 3 në Superkupën e Spanjës dhe nga një në Kupën e Botës për Klube, Kupën Interkontinentale dhe Superkupën e UEFA-s.
Një aspekt ku Mbappé spikat është ndikimi i tij më i gjerë në lojë.
Ai nuk është vetëm finalizues, por kontribuon edhe në ndërtimin e aksioneve, duke qenë i përfshirë në 108 gola gjithsej (gola + asistime), çka tregon një profil më të gjithanshëm në krahasim me Ronaldon në fillimet e tij te Reali.
Megjithatë, sezoni aktual rrezikon të përfundojë zhgënjyes për madrilenët.
Ata janë eliminuar nga Bayern Munichu në çerekfinale të Championsit dhe nga Albacete në Kupën e Mbretit.
Në kampionat, ndonëse janë në vendin e dytë, diferenca prej 11 pikësh me Barcelonën e bën situatën të vështirë, sidomos me “El Clásicon” e 10 majit që mund të vendosë gjithçka.
Në përfundim, Mbappé ka pasur një start statistikor mbresëlënës, por pas 100 ndeshjeve, avantazhi historik mbetet ende në anën e Cristiano Ronaldos./GazetaExpress/
